Sot zyrtarisht dështoi edhe raundi i tretë për zgjidhjen e presidentit. Asnjë kandidaturë ende nuk është marrë të paktën zyrtarisht si e mirëqenë për tu propozuar duke marrë parasysh edhe vendimin e opozitës për ta bojkotuar si proces.
Nesër është lajmëruar të mbahet raundi i parafundit për zgjedhjen e presidentit. Por kreu i grupit parlamentar të Partisë Socialiste Gramoz Ruçi ka bërë thirrje që nesër duhet të konsumohen të dy raundet e mbetura për presidentin.
Por çfarë ndodh nëse nesër digjen të dyja raundet për zgjedhjene kreut të shtetit?
Presidenti i Republikës aktual Bujar Nishani ka mandat të vlefshëm deri më 24 korrik dhe asnjë ditë pas kësaj date nuk mund të qëndrojë në detyrë.
Mandati i një presidentit në Shqipëri mbaron 5 vite pas datës së mandatimit të tij pra 24 korriku i vitit 2012 me korrikun e vitit 2017.
Në rast se nuk ka një President të zgjedhur deri më 24 korrik, sipas Kushtetutës vendin e tij e zë Kreu i Kuvendit, pra Ilir Meta. Pas 45 ditësh parlamenti shpërndahet dhe vendi shkon në zgjedhje të parakohshme.
Emërimi hipotetik i Metës mund të bëhet me një seancë të jashtëzakonshme të Kuvendit që përkon të jetë në korrik, duke shmangur pozicionin vakant të Presidentit.
Legjislatura e tanishme ka mandat legjitim deri më 9 shtator.
Këto janë tezat e mundshme në rast se palët nuk do të arrijnë dot të kenë një marrëveshje në kohë. Pavarësisht kësaj duhet thënë se me ndryshimet Kushtetuese Presidenti i Republikës mund të zgjidhet dhe me një shumicë votash të thjeshtë që është 71 deputetë në raundin e katërt dhe të pestë. (M.D/ Shuplaka)
Discussion about this post