Sot një faturë prej 3 milionë lekësh të energjisë elektrike ka nxjerrë zbuluar një laborator droge mes Fierit. Në një vilë, kultivohej kanabis, ndërsa 6 burra dhe 2 gra janë vënë në pranga.
Dje, u zbulua një laborator në një magazinë në periferi të Tiranës, në Shkozë. 10 persona të arrestuar.
Tre ditë më parë një tjetër laborator u zbulua në Skrapar, që u shoqërua me 2 arrestime, 3 shkarkime në Policinë e Shtetit dhe 8 hetime disiplinore.
Fatmir Xhafaj ka më pak se një muaj në krye të Ministrisë së Punëve të Brendshme, por me sa duket ka bërë punën e qindra ditëve të ish-kolegut të tij Saimir Tahiri.
23 tonë kanabis është sasia e drogës kapur nga Policia Shqiptare, në thuajse 20 ditë, për të mos llogaritur pastaj denoncimet në rrjete sociale, mes të cilave 400 tonë denoncuar nga ish-kryeministri Sali Berisha. Dhe kushedi sa tonë të tjerë janë fshehur maleve e fushave.
Aq e dukshme është puna e Xhafajt këto ditë, sa edhe ish-ministri i Drejtësisë Ylli Manjani që kish ngritur zërin për drogën në kohën e Tahirit, e përgëzoi për punën e bërë, atë dhe Policinë e Shtetit.
Dhe puna e Xhafajt në fakt është thikë me dy presa: nga njëra anë i duhet të punojë por nga ana tjetër kapja e kaq shumë droge dhe kaq shumë laboratorësh e nxjerr zbuluar me deklaratat që pjesëtarë e ish-pjesëtarë të qeverisë bënin kohë më parë.
S’po dihet se ç’po funksionon në Policinë e Shtetit. U shkathtësuan informatorët, policia mori më shumë guxim, apo u vendos shpejt e shpejt ndërhyrja sipas informacioneve kyçur në sirtare?! Apo ndonjë version i tipit ”fajin e kishte Saimir Tahiri”?! Se me siguri, droga këto 20 ditë nuk u mboll!
Punët nisën të lëvizin me shkarkimin e Saimir Tahirit, që Rama e vlerësoi si ministër i ”suksesshëm” i qeverisë. Të mësuar me Tahirin, që s’linte rast pa dalë në ekran, tani na duket pak e çuditshme kjo distancë që Xhafaj mban me mediet.
Dhe ta mendosh që Tahirit iu desh kohë ta pranonte publikisht që kanabisi ekzistonte dhe se po merrte përmasat e një fenomeni. Mediatikisht tentoi ta mbante nën kontroll, duke publikuar video aksionesh me disa rrënjë, por kurrë në këto përmasa e duhet thënë që ka një diferencë të madhe të kapësh fshatarët me 10 a 100 rrënjë dhe të shkatërrosh nyje të sistemit të drogës.
Nuk dihet nëse ministri i ri do të mbajë këtë vrull edhe pas zgjedhjeve, në mos kjo dëshirë do të nisë t’i zbehet ashtu si padashje nëse fitojnë një mandat të dytë.
Por një gjë është e sigurtë, se ”dora e shtetit” po pati vullnet nuk ka si të mos jetë e fortë e në këtë rast, e meritojnë një ”Bravo ”. Veçse duhet uruar të mos ndalen se kushedi sa informacione ka sirtareve!/Valmora Gogo- SHUPLAKA
Discussion about this post