Ministria e Energjisë dhe Industrisë informon mbi ecurinë e deritanishme të operacionit të kërkimit të tre minatorëve kinezë, të cilët kanë mbetur të bllokuar në minierën e Bulqizës, pas shpërthimit të së shtunës.
Nëpërmjet një njoftimi për shtyp, ministria bën me dije se ashtu siç u raportua edhe në media, pas mesditës së sot me grupi i shpëtimit u detyrua të ndërpriste kërkimet, për shkak se raportohej për rrjedhje gazi.
“Pas mesditës së sotme u bë ajrimi i minierës dhe futja e katër punonjësve të ekipit të avaro-shpëtimit. Ata arritën të bëjnë vetëm 70 metra drejt objektivit pasi sapo kaluan nivelin e 16 u dha sinjali i ngjitjes lart për shkak të përqindjes së lartë të gazit hidrogjen në ajër. Në këto kushte, u reagua menjëherë nga ekipi drejtues i avarive dhe u nxor grupi sërish në nivelin e 14 për të mos rrezikuar jetën e tyre.”, shkruhet në njoftim.
Krahas njoftimit, pamje të rralla janë publikuar nga momentet e operacionit të kërkim-shpëtimit. Grupet e shpëtimit, me uniforma dhe mjete pune nga më të ndryshmet, shfaqen në nivele të ndryshme të minierës, nga e cila po përpiqen të nxjerrin tre minatorët kinezë, të cilët patën fatin e keq të bllokoheshin, pas shpërthimit të gazit pesë ditë më parë.
Ndërkohë, zv.ministri Gëzim Musabelli, po shqyrton mundësi të reja për përforcimin e sistemit të ajrimit dhe tentativat e shpëtimit.
“Nga niveli 14 deri në nivelin e 21 ku dyshohet se ndodhen minatorët është një distancë prej 240 metrash. Ekipi drejtues i operacionit nën kordinimin e zv.ministrit të Energjisë dhe Industrisë z.Gezim Musabelli po shqyrton një mundësi të re për përforcimin e sistemit të ajrimit dhe do të vazhdojë punën edhe gjatë natës me shpresën se mëngjesin e nesërm mund të provohet një tjetër tentativë për të zbritur grupet e shpëtimit në nivelin 21.”, vazhdon më tutje njoftimi. (D.D/Shuplaka)
Discussion about this post