Çfarë tha Preç Zogaj për Ardit Gjebrenë që e nxiti të kundërpërgjigjej

Intervista e Ardit Gjebresë me një të burgosur gjatë vitit të kaluar ka shkaktuar shumë polemika.

I ftuar në një bisedë me studentët e UET, Arditi u shpreh se emisioni i tij nuk ka ndikuar aspak tek vendimi i gjykatës për të dënuarin për vrasje Marjan Rroku.

Gjatë bisëdës me studentët, Gjebrea u shpreh se mediat e “kryqëzuan” dhe e akuzuan atë si avokat i një vrasësi gjatë qëndrimit rreth 24 orë rresht me të në burg.

Prezantuesi i “E djela Shqiptare”, përmendi edhe analistin Preç Zogaj, i cili në një shkrim të tij e akuzonte Gjebrenë se intervistën me të burgosurin ai e bëri vetëm e vetëm për të fituar audiencë.

Pasi moderatorja Belina Budini e pyeti Gjebrenë lidhur me shkrimin e Zogajt, ai u përgjigj kështu:

“U fol për investigim, ndërkohë që të gjithë ata gazetarë që folën për këtë gjë nuk investiguan se cili ishte programi im. Unë kisha bërë edhe dy puntata të kaluara me konsullin e nderit dhe me një edukatore. Po bëja thjesht në kuadrin e programit “24 orë me, një të burgosur”. Te Marjan Rroku, unë nuk shkova për të sjellë historinë e tij se përse është burgosur. Unë shkova aty për të parë si i kalon 24 orë një i burgosur. Policët, të burgosurit kanë familje pas. Dhe nuk janë pak. Unë jam ai, i cili kam bërtitur dhe bërtas akoma që të rikthehet dënimi me vdekje në këtë vend. Kush vret, duhet të vritet. Askush nuk më ka pyetur për këtë gjë. Askush nuk më pyeti, përse ti që je pro dënimit me vdekje, si nuk the asnjë fjalë për këtë gjë? Thjesht sepse nuk shkova për këtë gjë. Askush nuk kërkoi, askush nuk investigoi, por të zellshmit donin të kryqëzonin.

Ata që e kuptuan, e kuptuan. U përfitua shumë audiencë nga kjo gjë, për të gjithë ata që shkruan dhe u morën për këtë gjë. Më pas Marjan Rrokun e morën të tjerë në intervistë, por më pas asnjë nuk foli.”.

Por çfarë ka shkruar Zogaj për Gjebrenë?

“Sindroma e audiencës me çdo çmim dha një shfaqje tronditëse këto ditë. Etja për shikueshmëri tregoi edhe një herë se nuk sheh kallot ku shkel dhe plagët që hap.

Lakmia ka sy flakërues, por nuk ka fe, nuk ka mëshirë. Si mund të ndalet, si mund të korrigjohet kjo mynxyrë? Duhet të besojmë kurdoherë në zgjimin dhe rizgjimin e ndërgjegjes profesionale të gazetarëve”, është Zogaj në shkrimin e tij. (D.D/Shuplaka)