Ashtu siç raportoi “Shuplaka” sot pasdite, në protestën e sotme të opozitës, u bashkua akademiku dhe pedagogu i njohur Mark Marku.
Nga “Çadra e Lirisë”, Marku tha se protestuesit po i japin një leksion demokracie gjithë Shqipërisë mbarë.
“Kjo protestë e ka nxjerrë Shqipërinë nga një pikë staniacioni dhe protesta juaj ka thyer kodin e heshtjes. Kur flas për kodin e heshtjes kam parasysh atë 50 vjeçar në Itali ky qytetarët ishin të friksuar për të treguar apo vendosur për fatet e tyre. Edhe ne për shkak të presionit qeveritar, përmes dhunës, kërcënimeve, blerjes kishim arritur në një pikë ku shoqërisë shqiptare po i shteronin fuqitë kritike. U mbyllën zërat kritik në vend.”, tha Marku.
Ndër të tjera, ish-deputeti i PD-së tha se gjendjen e rënduar të politikës shqiptare, e vërteton më së miri edhe mbledhja e firmave për Vettingun.
“Se sa rëndë është gjendja e tregon nisma e 50 shoqatave kundër protestës së opozitës. Imagjinoni në çfarë niveli ka arritur shoqria shqiptare ku shoqëria civile bën protestë kundër protestës së opozitës. Ka disa sfera autonome që nuk cënohen në një shoqëri demokratike dhe kjo qeveri i ka goditur këto sfera. Nuk është shoqëria që shkon tek një parti por është partia që shkon tek njerëzit dhe ideja e zotit Basha për krijimin e kësaj agore ku diskutohen problemet e Shqipërisë është një ide jashtëzakonisht emancipuese për shoqërinë shqiptare.”, shtoi Marku. Sipas tij, kjo protestë ka vrarë frikën e qytetarëve. (D.D/Shuplaka)
