Sokol Cikalleshi po kalon momentin më të keq të karrierës së tij, sepse ka disa javë që nuk është aktivizuar me klubin e tij Bashakshehir i cili është në vendin e parë në Turqi. Sulmuesi i Kombëtares Shqiptare kishte shënuar 13 gola edhe pse kishte luajtur vetem 15 ndeshje. Ishte vetëm sezoni i parë në Stamboll dhe detyrimisht që ambientimi me ekipin kërkonte kohën e vet, dhe për këtë arsye pritej një shpërthim i kavajasit, por kjo gjë nuk ndodhi. Por ky mosaktivizim nuk e shqetëson farë Cikalleshin i cili në një intervistë për “ Sport Ekspres” ai u shpreh se :
“Në të vërtetë, nuk ka asgjë për t’u alarmuar. Të luash në këto nivele dhe mbi të gjitha në një klub si Bashakshehiri nuk është aspak e lehtë. Ka shumë presion dhe niveli i futbollit është shumë i lartë. Mos të harrojmë që Bashakshehiri është në krye të kampionatit turk dhe kjo tregon qartë çfarë niveli ka kjo skuadër. Sulmuesit e tjerë kanë shënuar dhe për këtë arsye po luajnë rregullisht, por kjo nuk do të jetë diçka afatgjatë”.
Gjithashtu ai foli edhe për aktivizimin e pakët në Kombëtare dhe se nuk do ndihej aspak i mërzitur nësë do lihej jashtë për ndeshjen me Izraelin sepse ka kush e zëvendëson:
“Në të vërtetë, jam shumë i qetë në këtë drejtim, sepse sulmi i Kombëtares është në duar të sigurta. Lojtarë si Balaj e Roshi, për shembull, janë në formë të shkëlqyer, ndaj gjithçka është OK, edhe nëse nuk grumbullohem unë. Për ndeshjen me Izraelin nuk i druhem mosgrumbullimit, ai është vendim që i përket trajnerit, por unë i siguroj të gjithë se do të kthehem në nivelin tim të zakonshëm, edhe më i fortë se më parë”.
Ndërsa përsa i përket të ardhmes Cikalleshi është shprehur se nuk ka ndërmend të lëvizi nga Bashakshehiri sepse do vijë edhe momenti i tij:
“ Jo, në asnjë moment nuk e kam menduar largimin. Në futboll duhet shumë punë dhe besim në vetvete, duke pranuar edhe ulje-ngritjet, që janë normale. I fortë është ai që i përballon këto luhatje dhe kthehet sërish aty ku duhet. Unë di të them vetëm që së shpejti do të ketë lëvizje për mua, por jo në nivel klubi, vetëm në minutazh. Do të vijë shumë shpejt momenti im”.