Sulmuesi i Akhisar Beledije, Sokol Çikalleshi, ka qetësuar të gjithë sportdashësit duke treguar se dëmtimi i pësuar në Kupën e Turqisë në ndeshjen ndaj ish-ekipit të tij, Bashakshehir, nuk është serioz. Në një intervistë telefonike të dhënë për “Supersport”, Çikalleshi ka folur për ekipin e tij të ri në Turqi dhe për kthimin në kombëtare.
Për dëmtimin
Dje bëra një rezonancë dhe rezultoi që fatmirësisht nuk është dëmtim i rëndë. Nga ky dëmtim maksimumi do humb ndeshjen e fundjavës me ekipin, pra shumë shpejt do jem gati, çështje 3-4 ditësh.”
Për aventurën e re tek Akhisari
“Mendoj se bëra zgjedhjen më të mirë që erdha te Akhisari sepse do kem më shumë minuta. Ndihem shumë mirë, jemi si një familje. Po luaj dhe jam sulmuesi kryesor, por edhe këtu ka konkurrence. Ndeshjet që kam bërë deri tani kanë qënë mjaft të kënaqshme, por uroj që të shënoj në ato të ardhshmet dhe të ndihmoj më shumë ekipin në arritjen e objektivave.”
Për kombëtaren
“Problemi im që s’jam thirrur në kombëtare kanë qënë minutat e pakta që kam patur te Bashakshehiri, por këtu minutat i kam dhe besoj se rikthimi në kombëtare është afër, që ndaj Italisë. Megjithatë këto i vendos trajneri, me të cilin kam folur shpesh, edhe pas dëmtimit. Të jesh në kombëtare është krenari dhe kënaqësi e veçantë. Uroj që të bëjmë gjëra të mira në rrugën drejt Botërorit.”
