Në këtë situatë të nderë, ku opozita është deklaruar përditë e më më fort se nuk do hyjë në zgjedhjet e qershorit, kryeministri Edi Rama ka vetëm një objektiv, të paktën nga sa ka thënë publikisht: të bëjë me se s’bën zgjedhjet në 18. E lajmëroi kur tërhoqi kandidatin për zgjedhjet vendore në Kavajë.
Por duket se një kandidat që i ka rezultuar fitues, po i ”dekonspiron” strategjinë e fushatës. Në mos e ka koordinuar mirë me të.
Kryebashkiaku i Tiranës, në një ditë të diel, ka dalë të përurojë së bashku me deputeten Blerina Gjylameti punimet e ujësjellësit të njësisë numër 4 në kryeqytet.
PS-ja e Ramës me sa duket ka vetëm një strategji, në kushtet kur përballë nuk do t’i ketë demokratët, por vetëm LSI-në dhe parti të tjera: dalja masive në votime.
”Të dalin masivisht në votime nëse duan që ne të vazhdojmë këtë ritëm. Nëse nuk duan që ne ta vazhdojmë këtë ritëm, nëse duan t’i ndërpresim punët, nëse duan t’i rikthehemi Tiranës së shkatërruar mjafton vetëm të rrimë në shtëpi. Ama nëse duam që Tirana të ecë përpara dhe siç po mbarojmë këtë muaj sheshin ‘Skënderbej”, bulevardin e ri, parkun olimpik dhe gjithë investimet e tjera të parkut të Tiranës, siç ishte Pazari i Ri apo Këndi i Lodrave, ne na duhet që çdo qytetar të dali dhe të thotë fjalën e vet”, ka kërkuar publikisht, me zë dhe figurë Erion Veliaj.
Socialistët me sa duket do të bëjnë të pamundurën për të bindur shqiptarët që të dalin për të votuar. Përherë, për partitë në qeveri, pjesëmarrja e ulët tregon ”zonën e rrezikut”, por në këto votime rreziku është i dyfishtë.
Sa më e lartë përqindja e mospjesëmarrjes, aq edhe më e lartë mbështetja për opozitën dhe Partinë Demokratike të Lulzim Bashës. Kështu që një përqindje e ulët, shton gjasat që përveç perceptimit të tanishëm të qytetarëve se pa opozitën këto zgjedhje duhen vënë në dyshim, shifrat e ulta të çojnë në konkluzionin se PS është mbështetur pak, edhe në nismën e saj për të hyrë në zgjedhje e vetme. (V.G/SHUPLAKA)
Discussion about this post