Cila do të jetë lëvizja e rradhës e opozitës? Braimllari në ”Fax News”: Jemi të përgatitur për çdo skenar

Deputeti i LSI-së Endrit Braimllari ka qenë sot i ftuar në ”Fax News” ku ka diskutuar në lidhje me lëvizjet e LSI-së si pjesë e Frontit Opozitar. 

Po ashtu Braimllari i ka quajtur të pamoralshme deklaratat e Ramës përpara Akademisë së Policisë, duke thënë se Rama s’ka moral, pasi qëndron në krye të krimit. 

“Sa i përket fjalës së Ramës te Akademia është tërësisht qesharake, pasi personi I parë që është i korruptuar është vetë kryeministri. Sa i përket kanabizmit është një projekt politik i vetë kryeministrit të vendit, dhe më pas këto para ti hedhë në fushatë, duke deformuar vullnetin e shqiptarëve, dhe më pas të mbante në këmbë strukturat kriminale.

Nuk ka moral sot kryeministri Edi Rama dhe të bëjë moral para policëve të rinj, që kanë nevojë të shkëputën njëherë e mirë nga politika. Hetimet për Tahirin nuk erdhën nga ana e Drejtësisë në vendin tonë, po erdhën nga përtej Adriatikut”, u shpreh Braimllari. 

Çfarë do të ndodhë me opozitën?

Opozita ka një aksion të përbashkët sa i përket qëndrimit në Kuvend, në Komisionet Parlamentare, ndërsa detyra jonë tashmë është të ndërgjegjësojmë qytetarët që kanë vuajtur mbi kurriz këtë qeverisje. Krimi nuk është i vetmi problem që shqetëson qytetarët, pasi një tjetër faktor është varfëria. Po ashtu Buxheti është qartësisht kundër shtresave në nevojë.

A do të ketë protesta?

Unë e kuptoj që Opinioni Publik e kërkon këtë, ne në LSI jemi të përgatitur për të gjithë skenaret, ne jemi të vendosur që beteja të bëhet në të gjitha institucionet, qoftë edhe në të gjitha rrugicat e vendit. Përkrahja e opozitës në ditët në vijim nuk do të jetë më vetëm politike, pasi kjo është një çështje që prek drejtpërdrejtë sigurinë kombëtare.

Lëvizjet e ardhshme do të jenë qytetare dhe Politike. Me lëvizje qytetare nënkuptojmë që të kemi komunikim direkt me qytetarët e të gjithë vendin. Kalimi në protesta është një akt final, që nuk ka kthim pas. Meraku sot i joni nuk është se kush voton frontin opozitar, e rëndësishme është fryma kundër krimit të organizuar. Qëllimet janë që të krijohet diversion te opozita për të kaluar vëmendjen.

A e mendonit katër vite më parë që do të ishit në këtë pikë?

Një forcë politike duhet të marrë parasysh të gjitha pozicionet e mundshme, qoftë në qeveri dhe qoftë në opozitë.

(E.K/FAXWEB)