Prej disa ditësh tashmë, nga shpallja e fitores së Partisë Socialiste në zgjedhjet e 25 qershorit, po qarkullojnë në media emrat e disa prej socialistëve që mendohet se mund të vendosen në kryen të ministrive në qeverinë e re të Edi Ramës.
E tillë është edhe lista që po qarkullon këto ditë, ku emra socialistësh shihen në të njëjtat poste sikundër disa të rinj në krye të ministrive të tjera.
Për shembull Fatmir Xhafaj lakohet se do të jetë sërish në krye të ministrisë së Punëve të Brendshme ndërsa Arben Ahmetaj mund të vendoset në krye të Ekonomisë për t’ia lënë vendin Anastas Angjelit në krye të ministrisë së Financave.
Kapërcim interesant është vendosja e Ditmir Bushatit në krye të Integrimit, ministri që deri tani ka qenë nën drejtimin e ministres së LSI-së Klajda Gjosha, për t’ia lënë ministrinë e Punëve të Jashtme Olta Xhaçkës.
Edhe ministria e Transportit që drejtohej nga Sokol Dervishaj i LSI-së, flitet se do i besohet Damian Gjiknurit. Almira Xhembulla vlerësohet si një kandidaturë në krye të ministrisë së Mjedisit, ndërsa Pandeli Majko si ministër Shteti për Rajonin.
E pandryshuar përveç Xhafajt shihet edhe Ogerta Manastarliu, e cila mundet që të vazhdojë të jetë në krye të ministrisë së Shëndetësisë.
(XH.A/SHUPLAKA)
Discussion about this post