Çili përgjigje Lelës: Linja editoriale që në fillim e shpallur nga unë. ”Mapo” ka qenë, është dhe do të mbetet liberale

Pasi u informua nëpërmjet portalit ”Shuplaka”, për të cilin komunikoi se nuk kishte qenë në dijeni për largimin e Alfred Lelës nga ”Mapo”, reagon në mediet e tij Henri Çili.

”Përfundimi i kontratës, me Lelën patëm bashkëpunim intelektual”, thotë Çili për ”Mapo”-n, duke shtuar se: ”Linja editoriale e shpallur nga unë në fillim. ”Mapo” ka qenë, është dhe do të mbetet liberale”

 “Formulimi dhe shpallja e linjës editoriale të mediave MAPO ka qenë një proces i hapur, profesional dhe i shpallur publikisht nga unë si botues, në numrin e parë të çdo viti të gazetes apo për çështje kruçiale, si zgjedhjet, reforma në drejtësi apo reformizmi në tërësi, përmes editorialeve të posaçme.

Profesioni i djeshëm i gazetarit ma jepte këtë luks drejtpërdrejt edhe pse me kosto shpesh. Me përfundimin e kontratës që kishim me drejtorin Alfred Lela është rasti të vë në dukje se patëm një bashkëpunim të shkëlqyer, duke i shtuar kësaj përbashkësinë e shumicës së ideve, koncepteve mbi zhvillimet e shoqërisë shqiptare në çdo plan, pavarësisht diferencave për zhvillimet korrente apo pozicionimin aktual të aktorëve politikë në Shqipërinë e momentit.

Ky bashkëpunim pozitiv, i hapur, etik dhe intelektual, i përfunduar këtu në këtë format, është një rast për koperim në formate të tjera pune me këtë figurë të medias shqiptare dhe së shpejti edhe DR i shkencave të komunikimit . Sepse Mapo ka qenë, është dhe do të mbetet thjesht LIBERALE. Thanks Lela dhe simpati për lirinë e mendimit!”, përfundon botuesi.

”Botuesi Henri Çili më dha tre opsione, i treti i të cilëve ishte puna si pedagog i Komunikimit në UET. Dy të tjerat parashikonin një linjë editoriale që përputhej me shpalljen e Henrit në një shkrim të para ca kohëve “një mandat të dytë për Ramën reformator”. Unë kam patur dhe kam kritikat e mia për opozitën e Bashës, por profesionalisht dhe as personalisht, nuk mund të shtyhesha drejt një qëndrimi të tillë, i cili shuante një pjesë të madhe të qëndrimeve të mia publike.”, shpjegonte dje Lela.

Në mars të vitit të kaluar nga ”Mapo” u largua edhe Artur Zheji. Vendin e tij e zuri Alfred Lela, i cili që nga dje është larguar po si Zheji. (V.G/SHUPLAKA)