Rudina Hajdari, e cila është kthyer sërish pranë PD-së për të qenë më tepër aktive, vjen në një kohë kur në krye të Partisë Demokratike është Lulzim Basha, krahasuar me 2009-ën kohë kur ajo punoi në Administratën Shtetërore gjatë qeverisjes së Berishës.
E pyetur se ç’mendon për Berishën dhe çfarë për Bashën, ajo shprehet se për të dy ka nga një vlerësim, ku njërin e konsideron një lider të ri dhe me vizion ndërsa tjetrin një figurë të rëndësishme historike jo vetëm për PD-në por për të gjithë vendin.
“Basha është një lider me format bashkëkohor, është në moshë politike të re, por garanton perspektivë ekzekutive. Veçanërisht teksti i tij politik artikulohet me sukses me të huajt, intelektualët dhe është shumë i kapshëm nga njerëzit e thjeshtë. Ekspozon jo vetëm faktet por ofron zgjidhje” –shprehet Hajdari.
Për të, secili në këtë forcë politike ka lënë diçka, duke iu referuar anëtarësimit në NATO, liberalizimit të vizave apo lëvizjes së lirë të qytetarëve që ndodhën gjatë qeverisjes të së djathtës.
“Me Berishën kemi një raport të afërt edhe familjar. Është lider historik brenda PD-së dhe mbetet pjesë e suksesit të saj”, vijon më tej vajza e Azem Hajdarit. (XH.A/SHUPLAKA)
