Ditën e djeshme u ndanë çmimet Nobel në Letërsi, ndërsa kandidat ishte dhe shkrimtari shqiptar Ismail Kadare. Pavarësisht dëshirës së mirë të shumë shqiptarëve, çmimin e fitoi novelisti britanik Kazuo Ishiguro.
Pas publikimit të fituesit, duket se shqiptarët u ndanë në dy pjesë, ata që u zhgënjyen dhe pjesa tjetër që filluan me fyerje në drejtim të Kadaresë dhe lidhjen e tij me të shkuarën komuniste.
Për gazetarin Denis Dyrnjaja, një shkrimtar si Kadare është vlerë e shtuar për vendin tonë, ndërsa vetë ai bën mirë që të ishte i sinqertë dhe të pranonte se në rrethana të caktuara dhe të imponuara i ka thurur lavde partisë dhe shokut Enver.
KOMENTI I DYRNJASË:
Kadare në count down-in e Nobelit
Nuk ka asnjë arsye për t’u ngazëllyer që edhe këtë vit Kadare nuk e mori Nobelin për Letërsinë. Nuk kam besuar ndonjëherë se kjo do të ndodhë edhe pse mirë do të ishte të ndodhte, se vlerat e mira i kemi si pikat e ujit në shkretëtirë.
Çështja nëse Kadare i ka shërbyer apo jo regjimit diktatorial komunist në Shqipëri duhet të jetë një debat i brendshëm dhe nuk duhet t’i cenojë vlerat e Ismail Kadaresë si shkrimtar, sot, edhe i kalibrit ndërkombëtar. Personalisht mendoj se ai me koshiencë ose nga detyrimi i ka shërbyer qoftë edhe në mënyrë jo të drejtpërdrejtë atij regjimi.
Çdo tentativë për ta paraqitur si disident të parakohshëm në komunizëm Kadarenë, është e kotë. Sinqeriteti do t’i shërbente dhe vetë shkrimtarit nëse pranonte se në rrethana të caktuara dhe të imponuara i ka thurur lavde partisë dhe shokut Enver. Kjo s’do t’i hiqte asnjë pikë vlerës së tij si shkrimtar i madh që shërbeu, jetoi dhe shkroi në dy sisteme me penë artistike, por fatkeqësisht në njërën prej epokave ajo pene ishte edhe shkruese e lavdeve politike.
(E.K/SHUPLAKA)
Discussion about this post