Kryeministri italian, Giuseppe Conte ka njoftuar të shtunën vonë për masat e reja që kanë marrë autoritetet me qëllim të parandalimit të përhapjes së koronavirusit.
Në mesin e masave të reja përfshihet edhe kontrolli policor i italianëve që tentojnë të largohen nga qytetet e tyre nëse nuk kanë nevojë.
Ajo që vihet re pas reagimit të Kryeministrit të vendit janë sindikatat në rajonin e Lombardisë të cilat kanë njoftuar për organizim të grevave të hënën, me qëllim të mbrojtjes së shëndetit të punëtorëve të tyre, pasi kanë thënë se dekreti qeveritar për mbyllje të bizneseve për shkak të koronavirusit ka lënë shumë hapësirë për interpretim.
Italia është përballur me shpërthimin më vdekjeprurës të pandemisë që përcillet me probleme në frymëmarrje.
Deri më tani në këtë shtet kanë vdekur të paktën 5,476 persona, shumica prej tyre në Lombardi, rajonin e pasur italian, në të cilën gjendet edhe kryeqyteti financiar, Milano.
Një dekret qeveritar, i nënshkruar të dielën, ka përcaktuar që të gjitha bizneset përveç atyre që janë të “domosdoshme” të mbyllen deri më 3 prill.
Në të është përfshirë një listë e gjatë e bizneseve, që janë përjashtuar nga kjo masë, pasi janë konsideruar jetike për të mbajtur gjallë zixhirin e furnizimit në Itali.
Gjatë ditës, disa kompani që përpunojnë metalin, më pas punëtorë të kompanive që merren me lëndë kimike, janë ankuar për sigurinë e tyre, pasi këta sektorë nuk lidhen me atë të shëndetësisë, andaj veprimtaria e tyre nuk është tejet e domosdoshme këto ditë.
Punëtorët e disa bankave po ashtu kanë kërcënuar me grevë, duke thënë se po detyrohen që të punojnë në kushte të pasigurta, pa maska, doreza dhe lëngje dezinfektuese.
Dihej edhe kjo që kjo situatë do sillte edhe pasoja të rënda në shumë fusha të jetës.
Discussion about this post