I infektuar me Covid-19, si i shpëtoi drejtësisë Mond Çekiçi muaj më parë

Edmond Çekiçi i ka shpëtuar drejtësisë pak muaj më parë kur u arrestua për armëmbajtje pa leje, me argumentin se ishte i infektuar me Covid-19.

Çekiçi ishte arrestuar në muajin shtator për armëmbajtje pa leje, por me kërkesë të prokurorisë, ai u lirua.

Viktima “Mond Çekiçi” në 24 shtator të vitit të kaluar u arrestua në flagrancë mbi një motor, për akuzën e mbajtjes pa lejë të një pistolete, prodhim austriak të quajtur “Steyer” kalibër 9 mm.

Por pavarësisht kësaj, anëtari i Bandës së Durrësit, nuk bëri asnjë ditë paraburgim dhe u lirua me argumentimin se ishte i infektuar nga Covid. Vendimi u dha nga prokurorja Rabiana Halili, e cila dy ditë më pas dha dorëheqjen para Këshillit të Lartë të Prokurorisë.

Mëngjesin e sotëm, Edmond Çekiçi u ekzekutua sapo doli nga banesa e tij. Viktima udhëtonte me mjet me shofer dhe një automjet tjetër i ka prerë rrugën. Mësohet se nga mjeti ka dalë shoferi i viktimës për të pyetur se çfarë kishte, ndërkohë që një nga personat ne mjetin tjetër ka qëlluar për vdekje Edmondin me bresheri plumbash. Menjëherë pas ngjarjes, autorët e ngjarjes janë larguar drejt Katundit të Ri, ku dhe kanë djegur automjetin.

(E.H/Faxweb.al)