Presidenti i Republikës, Ilir Meta ka reaguar për ndarjen nga jeta parakohe të Gjeneral Brigade Ndriçim Sallaku, i cili nuk mundi dot të fitojë betejën me Covid-19.
Meta shkruan në Facebook se Sallaku shërbeu me shumë përkushtim për 3 dekada në uniformën e ushtrisë, ndërkohë ai i shpreh ngushëllimet e tij familjes të së ndjerit.
“Shumë dhembje e trishtim për ndarjen e parakohshme nga jeta të Gjeneral Brigade, Ndriçim Sallaku, profesionistit të përkushtuar të Forcave tona të Armatosura, i cili humbi betejën me COVID-19.
Për mbi tre dekada angazhim për modernizimin e ushtrisë shqiptare, ai shërbeu si rrallëkush nën uniformë duke spikatur për aftësitë e Tij drejtuese dhe organizative, së fundmi edhe në detyrën e rëndësishme të Komandantit të Komandës Mbështetëse, ku dëshmoi gjithashtu vlera të larta humanizmi në përballimin e situatave të vështira të përmbytjeve, në ndihmë të qytetarëve në nevojë.
Duke shprehur ngushëllimet më të ndjera për këtë humbje të madhe, jam pranë familjarëve, miqve dhe kolegëve të Tij në këto momente tepër të rënda për ta.
Në memorien e Forcave tona të Armatosura, vepra e Gjeneral Brigade, Ndriçim Sallaku do të kujtohet gjithmonë me respekt e mirënjohje!” shkruan Meta.
(E.H/Faxweb.al)
Discussion about this post