Covid prek në masë të vaksinuarit në Gramsh, mjeku apel qytetarëve për të respektuar masat

Shifrat e infektimeve me covid kanë njohur një trend rritës javët e fundit, përfshirë edhe qytetet e vogla.

Një në dy teste që kryhen për covid në qytetin e Gramshit rezulton pozitiv. Shefi i epidemiologjisë në këtë qytet Hyqmet Ibrushi thotë se të infektuarit i takojnë zonave rurale dhe urbane. Në kushtet që vera do të kaloj jo e qetë, Ibrushi i bën thirrje qytetarëve të mos neglizhojnë me mbajtjen e masave anti- covid.

“Pas një pauze prej shumë ditësh, nga data 21 qershor e deri sot kemi një rritje të rasteve me Covid. Nga dita në ditë kemi shtime. Nëpërmjet televizionit tuaj dua tu bëj thirrje qytetarëve të respektojnë rregullat, duke qëndruar në karantinë, apo higjienë dhe distancimi fizik. Nga personat pozitiv, që janë aktiv sot, 27 janë të vaksinuar me 2-3 doza, ndërsa të tjerët jo”- u shpreh ai për Faxnews.

Autoritetet e vënë theksin te respektimi i masave sesa te vaksinimi pasi rezulton se të infektuarit janë vaksinuar me 2-3 deri në kater doza.

Vitin e shkuar si pasojë e covid vetëm në Gramsh humbën jetën 18 qytetarë , kryesisht të moshës së tretë.