Ditën e sotme LSI do të mbledhë Kryesinë e saj për herë të parë nën drejtimin e Kryetares Monika Kryemadhi. Mbledhja do të nisë nga ora 12;00 e mesditës.
Nuk dihet ende tema e diskutimit, po padyshim që denoncimet e blerjes së votave nga LSI dhe parti të tjera nuk do të mbesin pa u shqyrtuar.
Pak minuta më parë Kryetarja e LSI-së Krymadhi ka pasur një reagim në lidhje me videot e denoncimit të PDIU-së ku tregohej qartazi si deformohej vota e kësaj partie.
Kryemadhi ka theksuar që ky nuk është rasti i vetëm dhe se LSI-ja po mbledh të gjitha provat për të denoncuar situatën para ndërkombëtarëve.
“Unë jam e bindur që kjo është vetëm një pjesë e vogël e asaj që ka ndodhur vërtet në 25 qershor, sikunder jam e sigurt se beteja jonë për të rikthyer legjitimitetin e votës së shqiptarëve sapo ka nisur. LSI tashmë është e qartë dhe e vendosur, e fortë dhe e bindur në luftën e saj për të rikthyer të drejtën themeltare të demokracisë, votën e lirë.
Ndaj për këtë do të jemi çdo ditë pranë qytetarëve, do të dëgjojmë dhe mbledhim çdo dëshmi manipulimi, do të hartojmë dhe ndërtojmë politikat tona për të dëshmuar këtë farsë elektorale, për të vërtetuar edhe njëherë para të gjithë shqiptarëve dhe ndërkombëtarëve që duan të dëgjojnë të vërtetën, se 25 qershori ishte dita e deformimit të votës.
Beteja jonë sapo ka nisur dhe bashkë me ne është shumica e shqiptarëve, ajo që paratë e drogës dhe krimit nuk arriten ta blejnë!”, thuhej ndër të tjera në reagimin e Kryemadhit.
(E.K/SHUPLAKA)
Discussion about this post