Dy vite më parë, transferimi i tij nga Juventusi te Milani ishte një rrufe në qiell të hapur… Leonardo Bonucci largohej nga shtëpia e tij, Torino, pas muajsh të tërë debati dhe krisjesh me trajnerin Massimiliano Allegri.
Një divorc që nisi të formohej pak nga pak që me stolin në tribunë në ndeshjen Porto-Juventus dhe disa prapaskena të tjera në dhomat e zhveshjes. Plot 42 mln euro, kontratë për pesë vite dhe pritje si një top player, ose ndryshe “ai që do të ndryshonte ekuilibrat në Serie A”.
Milani i dorëzoi edhe shiritin e kapitenit. Por, nga e thëna në të bërë, shumë gjëra ndryshuan. Bonucci nuk u shfaq në nivelet më të mira dhe zhgënjeu totalisht.
Kështu, pasi Juventusi tentoi të merrte Godin por pa sukses, drejtuesit e klubit bardhezi vendosën të kthenin në shtëpi mbrojtësin italian, duke përfshirë në shkëmbimin me kuqezinjtë Caldaran dhe Gonzalo Higuain, përveç se 16 mln eurot e huazimit për argjentinasin.
Dukej sikur shkëmbimi i interesonte të gjithëve, deri kur penalltia e humbur nga Pipita në Milan-Juventus ndryshoi rrjedhën. Bonucci, këtë sezon, bëri mirë, edhe pse tifozët e Juventusit dhe vetë Massimiliano Allegri prisnin më shumë.
Kanë kaluar dy vera që kur Milani e transferoi në “San Siro”, por sërish e njëjta situatë paraqitet për mbrojtësin italian, sidomos duke parë se Matthijs De Ligt pritet të jetë blerja e re bardhezi. Manchester City mund të jetë destinacioni i Bonuccit, me Pep Guardiolan që ende e dëshiron, por duhen rreth 35 mln euro për t’ia marrë “Zonjës”.
Discussion about this post