Në një deklaratë të paralajmëruar për mediat, demokratja Jozefina Topalli, nuk i kurseu akuzat ndaj Lulzim Bashës, por habiti me mungesën e shpalljes së kandidaturës së saj për kryetare të Partisë Demokratike.
Duke e cilësuar Lulzim Bashën si katastrofë të Partisë Demokratike, ajo u ndal tek humbja e zgjedhjeve, marrëveshja e tij me Ramën, tek frika sipas saj që Basha ka nga e vërteta, nga një proces i hapur dhe transparent.
Duke zgjedhur të mos kishte një komunikim me gazetarët, Jozefina Topalli e mbylli fjalën e saj me thirrjen drejtuar demokratëve për bashkim, me qëllim mbrojtjen e statutit.
“Duke e bërë procesin zgjedhor antistatuor, po kërkon t’i shmanget dhënies së llogarisë dhe marrjes përsipër të përgjegjësisë për humbjen katastrofale. Disa qindra mijëra vota që ai ia hoqi PD-së nuk i justifikon. Demokratët nuk ia falin kurrë dhe sikur të manipulojë 100% rezultatin. Z. Basha është katastrofa e PD-së. Pas strategjisë së gabuar, taktikave virtuale, rrëzoi PD-në dhe i dha mundësi të madhe Edi ramës, bashkëudhatrit të orëve të vona të kësaj vere.
Ringritja fillon vetëm me largimin e Z. Basha, demokratët e dinë shumë mirë këtë. Ndaj Basha kërkon të manipulojë procesin, nuk pranon barazi të hapur, proces të hapur dhe transparent, konkurrencë idesh. Tmerrohet nga e vërteta, raporti më i vështirë që ai ka me jetën. Tek të gjitha këto është shpëtimi i Partisë Demokratike.
Ne kërkojmë garë të barabartë, ballafaqim, respektimin e vendimmarrjes sipas statutit. Pa këto nuk ka dhe nuk mund të ketë garë. I bëj thirrje Z. Basha të ndërpresë menjëherë paligjshmërinë dhe pengmarrjen e Partisë Demokratike, përpara se të përballeht me revoltën e demokratëve.
U bëj thirrje të gjithë demokratëve të bëhemi bashkë. Ndaj dhe them që është koha të mbrojmë statutin, të drejtën tonë, vlerat demokratike që na lidhin bashkë në këtë familje të madhe që jemi.”, u shpreh ndër të tjera Jozefina Topalli.
Discussion about this post