Edhe pse është më e interesuara për mbylljen sa më parë të Reformës Zgjedhore, që sipas saj do të sjellë zgjedhje të parakohshme, opozita ka shtyrë takimin e sotëm të grupit të punës.
Burime bëjnë me dije për Faxweb.al se PD ka kërkuar që të shtyhet për të hënën takimi që ishte parashikuar të mbahej sot mes grupit të 4 përfaqësuesve politikë, ndërsa në axhendën e diskutimit të sotëm ishte ndryshimi i sistemit zgjedhor.
Ky i fundit është një nga kërkesat e opozitës parlamentare, të përfaqësuar nga Rudina Hajdari, por që në heshtje duket se po kundërshtohet nga partitë më të mëdha politike.
Në një intervistë televizive mëngjesin e sotëm Rudina Hajdari se nuk e kishte pritur mirë shtyrjen e takimit dhe uroi që të mos kishte bojkot.
“Ka patur disa zhvillime momentet e fundit. Opozita e bashkuar e ka anuluar takimin e ditës së sotme, duke e shtyrë për të hënën. Nuk është mirë që të shtyhen takimet, pasi 15 marsi është javën tjetër. Ishte ditë e rëndësishme, sidomos për mua, duke qenë se sot do të flitej për ndryshimin e sistemit, por mbrëmë në darkë vonë erdhi njoftimi se do të shtyhet takimi.
Urojmë që të mos jetë bojkot, por ndihem e shqetësuar për këtë fakt sepse është hera e dytë që tema e ndryshimit të sistemit shtyhet. Duhet të kuptojmë që kjo reformë bëhet për shqiptarët dhe ashtu siç kemi dëgjuar propozimet e opozitës dhe kemi qenë të hapur, edhe opozita duhet të ketë durim dhe të dëgjojë propozimin e opozitës në Parlament dhe shqetësimet e saj”, deklaroi Hajdari.
Pavarësisht se palët kanë rënë dakord që të mbyllin Reformën në datën 15 Mars, duke parë ecurinë e saj, derimë tani, kjo duket e pamundur pasi ka ende shumë çështje të pazgjidhura mes palëve.
Vetë socialisti Gjiknuri disa ditë më parë nuk e përjashtoi mundësin që Reforma Zgjedhore të kalojë në Kuvend vetëm gjatë muajit Prill.
(E.K/Faxweb.al)
Discussion about this post