Britanikja “Daily Mail” i ka kërkuar falje bashkëshortes se presidentit Trump, zonjës së parë Melania Trump për artikullin e botuar në gushtin e vitit të kaluar ku hidhte dyshime të forta lidhur me punën e saj si modele në të kaluarën.
BBC raporton se pavarësisht faljes publike, gazeta britanike do të dëmshërblejë me 2.9 mln $ zonjën e parë të SHBA-ve.
Gazeta britanike njoftoi në numrin e sotëm se i kërkonte ndjesë Zonjës së Parë të Shteteve të Bashkuara të Amerikës, lidhur me artikullin e botuar ku nënvizohej se “Melania Trump pasi shkoi të punonte në SHBA, kreu shërbime përtej modelingut”.
Ish-modelja i hodhi poshtë akuzat e tabloidit britanik duke thënë se artikulli ishte një mashtrim dhe i pabazuar në fakte duke e hedhur menjëherë në gjyq gazetën.
“Daily Mail” ka vendosur të tërhiqet plotësisht, duke thënë se akuzat e bëra nga ata ishin të pavërteta dhe duke premtuar se do ta paguajnë një më një Zonjën e Parë amerikane duke i kërkuar falje për dëmin moral.
“Kërkojmë falje për shqetësimin që i kemi shkaktuar Melania Trumpit. Për ta zgjidhur çështjen që ajo ka ngritur në gjykatë, ne kemi rënë dakord që të paguajmë të gjitha dëmet e shkaktuara”, theksohet në artikullin e sotëm të gazetës britanike. (M.D/ Shuplaka)
