Dallgët shkatërrojnë pengesat e drurit dhe futen në shëtitore. Gjendja në Durrës prej dëmeve të erës

Fax News informon se era e fortë që ka përfshirë Durrësin prej mëngjesit të sotëm, ka shkaktuar mjaft dëme në zona të ndryshme të qytetit.

Një prej zonave e cila ka pësuar dëme nga era e fortë është shëtitorja Taulantia në Vollga në lagjen nr.1 të Durrësit.

Pjesët prej druri janë shkatërruar nga dallgët e detit të cilat kanë kaluar edhe në pjesën e shëtitores për shkak të stuhisë së erës.

Dërrasat dhe leshteriku i bregdetit janë shpërndarë nëpër shëtitoren në afërsi të Sfinksit, aq e preferuar nga durrsakët. Po ashtu dëme ka patur pothuajse në të gjitha lagjet e brendshme të qytetit, kryesisht në pemë të dëmtuara apo objekte të ndryshme që era ka marrë para.

Gjatë ditës kapeteneria e portit bëri me dije se shpejtësia e erës ka shkuar 25 metra për sekond, ndërsa në det të hapur 35 deri në 40 metra për sekondë. Valëzimi në det brenda gjirit të Durrësit shkon 6 ballë ndërsa në det të hapur 8 ballë. Megjithëse ditë e shtunë, e gjithë vija bregdetare është thuajse e boshatisur, ndryshe nga fundjava e kaluar që solli një dyndje pushuesish në plazhin e Durrësit.

Si pasojë e motit të keq në Durrës, mëngjesin e sotëm kapiteneria e portit ka urdhëruar pezullumin e lundrimin të anijeve të peshkimit dhe atyre të tonazhit të mesëm deri ne përmirësimin e kushteve atmosferike. Ende nuk ka njoftim nëse do të ketë vonesa në nisjen e trageteve mbrëmjen e sotme  nga Porti Durrësit në drejtim të brigjeve italiane.

(E.L/Faxweb)