Darka me Ramën, Meta: Folëm për drejtësinë, me opozitën s’ka negociata pa u zbatuar Vettingu!

Ilir Meta Kreu i Kuvendit dhe i LSI-së Ilir Meta, foli sot për darkën e mbrëmshme me kryeministrin Edi Rama dhe për negociatat me opozitën.

Në një deklaratë për mediat, Meta tha se nuk dëshironte të hynte në detaje por pranoi se kanë folur mbi drejtësinë dhe Vettingun.

“Nuk dua të hyj në çështje konkrete dhe në çështje specifike. Rëndësinë e vazhdimit të reformës në drejtësi në mënyrën më kushtetuese, ligjore dhe transparente dhe kjo çështje e domosdoshme dhe së dyti rëndësinë e dialogut për të garantuar standardet më të larta evropiane të zgjedhjeve më 18 qershor dhe kjo kërkon klimë dialogu dhe bashkëpunimi.”, tha Meta.

PYETJE-PËRGJIGJET ME GAZETARËT:

Si do zhvillohet ky dialog se opozita është jashtë parlamentit?

Meta: Patjetër që dialogu me opozitën është kyç për integrimin europian. Parlamenti në radhë të parë është i opozitës, maxhoranca ka dhe qeverinë, kështu që opozita parlamenti ka dhe është gjithnjë e mikpritur që të çojë përpara kërkesat e saj.

Do ta prisni që të vijë apo do ketë negociata që ajo të rikthehet në Parlament?

Meta: Ju e dini që Parlamenti pa opozitën nuk ka kuptim, të bëjmë të gjitha përpjekjet që besimi dhe klima për zgjedhjet të përmirësohet.Tani jemi në moment mjaft të rëndësishëm për Reformën në Drejtësi.

Jeni në negociata për t’i rikthyer në parlament?

Meta: Negociatat nuk hapen pa u realizuar vettingu dhe zgjedhjet e standardeve. Ato nuk hapen pa u zbatuar në mënyrë korrekte ligji i Vettingut dhe pa u realizuar zgjedhjet e lira 18 qershorit. Hajt të bashkojmë forcat për të ecur në këto dy drejtime.

Komisionet e Vettingut…

Kuvendi do të zhvillojë në mënyrën më transparente të gjitha procedurat që i takojnë.

Mbledhja e kryesisë vjen edhe si pasojë e takimit të mbrëmshëm me Z.Rama?

Mbledhja e sotme ka qenë e planifikuar më parë në vijim të angazhimit të vazhdueshëm.

Do ketë një vendimarrje në këtë mbledhje për koalicionit apo darka e djeshme e ka zyrtarizuar tashmë që ju do vazhdoni sëbashku?

Meta: Unë mendoj që të gjithë duhet të punojmë që 18 qershori t’i japi Shqipërisë notën më të mirë për zgjedhjet dhe t’u japë një impuls mjaft të rëndësishëm gjithë reformave integruese të vendit. (D.D/Shuplaka)