Kryeministri Edi Rama ka reaguar menjëherë pas mesazhit të zyrtarit të DASH-it, Thomas Shannon, i cili kërkoi përfshirjen e të gjitha partive politike në zgjedhje.
Menjëherë, kreu i Qeverisë ka reaguar ndaj deklaratës së Departamentit Amerikan të Shtetit në faqen zyrtare, duke e shpërndarë atë në llogarinë e tij në “Facebook”, nën titullin “Kush gënjen?”.
KUSH GËNJEN (22)
Departamenti i Shtetit kërkon reformën në drejtësi dhe pjesëmarrjen e të gjitha partive në zgjedhjet parlamentare të 18 qershorit. Ja edhe njoftimi i plotë, publikuar në faqen zyrtare të DASH:
“Ambasadori Thomas A. Shannon, Nënsekretar për Çështjet Politike, u takua sot me Ministrin e Jashtëm shqiptar Ditmir Bushati për të adresuar interesat e përbashkëta në marrëdhëniet tona bilaterale dhe rajonin. Nënsekretari rikonfirmoi partneritetin e ngushtë midis Shteteve të Bashkuara dhe Shqipërisë, mbështetjen tonë të fortë për përpjekjet e Shqipërisë për reformën në drejtësi dhe angazhimin tonë të përbashkët ndaj vlerave demokratike, sundimit të ligjit dhe respektimit të të drejtave të njeriut. Ambasadori Shannon theksoi gjithashtu rëndësinë që të gjitha partitë politike në Shqipëri të marrin pjesë në zgjedhjet e ardhshme parlamentare.”
(XH.A/SHUPLAKA)
