Me zhvillimet e reja teknologjike dukshëm kanë ndryshuar edhe mënyrat e bërjes së gazetarisë. E ky globalizim i mjeteve dhe informacionit nuk mund të mos prekë edhe Shqipërinë.
Tendenca për t’iu shkëputur medias tradicionale për arsye nga më të ndryshmet po krijon një panoramë të re ku “ujqit” e vjetër të gazetarisë po përshtaten edhe në hapësirën e re mediatike tashmë në web.
Vëllezërit Shpëtim dhe Mentor Nazarko nuk ka shumë kohë që kanë hapur portalin e tyre Konica. Ata kanë qenë dhe janë dy personazhe të analizës edhe në televizionet shqiptare por që së fundi e kanë shpërngulur gazetarinë e tyre në një platformë moderne ashtu sic kanë bërë shumë kolegë të tyre.
Alfred Lela, i larguar nga Mapo sapo ka hapur webin e tij Politiko. Largimi i Lelës si drejtor i Mapo u bë një debat i gjerë pasi u fol për një ndryshim linje editoriale apo afrim me Ramën i gazetës dhe botuesit.
Mira Kazhani po ashtu është përshtatur në një hapësirë online pas largimit të saj nga Wake Up në Top Channel. TiranaPost është platforma ku Kazhani me eksperiencë në median tradicionale ka vendosur të shpërngulë gazetaribërjen e saj.
Artur Zheji është një nga gazetarët dhe analistët që ka hapur po ashtu një web të vetin. 360gradë është portali ku Zheji po bën gazetari dhe analizë pas eksperiencës në televizion por jo vetëm.
Referuar të dhënave zyrtare të AKEP janë rreth 650 online në versionin shqip që funksionojnë brenda hapësirës administrative të Republikës së Shqipërisë, nga të cilat rreth 72 prej tyre administrohen nga gazetarë kombëtarë dhe lokalë nga të gjitha qytetet kryesore të vendit.
12 prej këtyre onlineve administrohen me struktura redaksionale prej vetë gazetarëve.
Vitet e fundit në Shqipëri ka një shpërthim të portaleve online. Në harkun kohor prej 5 viteve, janë regjistruar 18.078 portale që kanë marrë domenin .al pranë AKEP.
Në këtë numër total përfshihen portale lajmesh, portale qeveritare, organizata dhe portale të institucioneve të edukimit.
Të dhënat e AKEP tregojnë se numri i domain-eve të regjistruar për vitin 2016 është 5 800, një rritje mbi 12% të domain-eve krahasur me vitin 2015.
Studimet lokale tregojnë se 12% e qyetarëve të 18-34 vjeç informohen online për zhvillimet me të fundit.
Me një popullsi rezidente prej jo më shumë se 2 milionë e 800 mijë banorësh që ka Shqipëria, duke e pjesëtuar me 650 portale funksionale në tregun kaotik të medias online kemi një portal për 4300 banorë. Pra një qytezë, një portal.
Duke ditur që personazhet e gazetarisë së lartpërmendur thjesht kanë ndërruar mjetin ku bëhet gazetaria, ka media që marrin përsipër të quhen media pa bërë të ditur strukturën sociale dhe financiare të tyre, gjë që vë në pikëpyetje gazetarinë që ata bëjnë dhe produktin që “shesin”.
E pra dashuria e vëllezërve Nazarko, Kazhanit, Lelës dhe Zhejit është media online dhe dëshira për t’iu përshtatur audiencës që gjithmonë e më shumë po “rrjedh” drejt web-it. (M.D/ Shuplaka)
Discussion about this post