Trajneri i kombëtares shqiptare, Xhani De Biazi, mendon se problemi kryesor është ai i mosaktivizimit të lojtarëve të prapavijës. Tekniku italian ka treguar se ka bërë një vëzhgim të lojtarëve në Europë dhe shqetësohet nga fakti se disa prej mbrojtësve nuk po gjejnë hapësira.
“I takova disa lojtarë. I fundit ishte Sadiku, që e pashë në ndeshjen e fundit, e që për fat të keq u mund 4-0. Ai vetë ishte mirë, megjithatë kemi të njëjtin problem. Kohët e fundit, lojtarët tanë nuk po luajnë shumë. I referohem këtu Ajetit, i cili dje luajti 90 minuta, apo Veselit që nuk u aktivizua. Situatë që nuk na ndihmon për të pasur një gjendje të mirë të ekipit për ndeshjen e marsit”, tha De Biazi
Po kështu De Biazi ka monitoruar edhe lojtarët si Veselin dhe Ajeti për të vendosur se cili mund të luajë përkrah Mavrajt, i vetmi që duket në formë dhe po luan rregullisht.
Sipas trajnerit Ajeti nuk ka probleme për sa i përket grumbullimit me Shqipërinë apo me zërat për pakënaqësi në lidhje me shiritin e kapitenit.
“Është një budallallëk që ka dalë nga mediat. Mavraj është i përfshirë në programin tonë të kombëtares. Ai na vlerëson shumë, i pëlqen gjithashtu që të jetë kapiteni, por për hierarki moshe dhe numër ndeshjesh, Agolli ka më shumë eksperiencë. Kur Agolli ta lërë futbollin dhe nëse Mavraj do të sillet mirë, do të jetë kapiten”, saktësoi trajneri. (J.V/Shuplaka)
