Trajneri i kombëtares shqiptare të futbollit, Xhani De Biazi, ka mbyllur turin e tij në kampionatin italian ku ka parë stërvitjet apo ndeshjet e klubeve si Udineze e Sampdoria, ndërsa i është kthyer punës për të përgatitur ndeshjen e 24 marsit ndaj Italisë. Këtë radhë, ai do të jetë i fokusuar te futbollistët shqiptarë që luajnë larg Italisë dhe në vend që t’i ndjekë nga televizori, siç bën me ndeshjet e kampionatit shqiptar, do të shkojë t’i shohë në veprim në ndeshjet që luajnë me skuadrat e tyre.
FSHF ka bërë të ditur se lëvizjet e radhës së trajnerit do të jenë drejt Gjermanisë dhe Zvicrës, për të parë në veprim disa nga lojtarët e padiskutueshëm të formacionit kuqezi. Turi fillon më datë 3 janar, De Biazi do të shkojë në Hamburg, për të ndjekur ndeshjen e skuadrës së Mërgim Mavrajt ndaj Bajer Leverkusenit.
Ndërkaq, një ditë më vonë, De Biazi do të mbajë premtimin që ka bërë për të qenë në stadium në ndeshjen e parë zyrtare të Paolo Tramexanit, ish-krahut të djathtë të tij në Kombëtaren shqiptare, si trajner i Luganos. Fati e do që në atë sfidë, Lugano të përballet me Bazelin. Ndaj De Biazi do të ketë kështu mundësinë që të shohë në veprim Armando Sadikun nga njëra anë dhe Taulant Xhakën nga ana tjetër, ndonëse prania e këtij të fundit është në dyshim pasi ka kaluar një gjendje gripale në javën e fundit dhe nuk është stërvitur rregullisht me ekipin. (E.K/SHUPLAKA)
Discussion about this post