Franca ka regjistruar qershorin e dytë më të nxehtë në histori që nga viti 1900, kur nisi regjistrimi i temperaturave. Katër rajone të vendit ndodhen nën alarm të kuq për shkak të të nxehtit ekstrem.
Teksa situata pritet të jetë serioze dhe gjatë muajit korrik dhe gusht, në parlamentin francez ka nisur një debat i ashpër për ajrin e kondicionuar në hapësirat publike. Politikania e ekstremit të djathtë, Marine Le Pen deklaroi se “ajri i kondicionuar shpëton jetë” dhe kërkoi që të instalohet dhe në ambientet publike.
Aleati i saj, Éric Ciotti, ka paraqitur një projektligj që parashikon ajër të kondicionuar të detyrueshëm në të gjitha hapësirat publike kryesore të vendit.
Franca ka aktualisht një përqindje më të ulët të përdorimit të ajrit të kondicionuar, krahasuar me vendet fqinje si Italia. Sipas agjencisë kombëtare të mjedisit, në vitin 2020 vetëm 25% e shtëpive franceze kishin ajër të kondicionuar, në krahasim me 14% në vitin 2016.
Qeveria franceze ka reaguar ashpër, duke e cilësuar propozimin si të gabuar. Qeveria e cilëson të djathtën ekstreme si “të paditur” dhe “të paaftë” për të ofruar zgjidhje reale për krizën klimatike.
Ministrja e Mjedisit, Agnès Pannier-Runacher, theksoi se ambientet e kujdesit për të moshuarit kanë pasur ajër të kondicionuar të detyrueshëm për më shumë se 20 vite në Francë. Ajo shtoi se, ndonëse është e domosdoshme mbrojtja e grupeve të ndjeshme, “ajri i kondicionuar nuk mund të instalohet kudo”, pasi kontribuon në rritjen e temperaturave të jashtme dhe është “zgjidhje e gabuar”.
Ndërkohë, udhëheqësja e të Gjelbërve, Marine Tondelier, e akuzoi Le Pen për një politikë mjedisore të reduktuar vetëm në “blerje kondicionerësh”. Ajo tha se zgjidhjet duhet të përfshijnë më shumë hapësira të gjelbra në qytete dhe izolim më të mirë të ndërtesave.
