Një audio e publikuar sot nga mbledhja e djeshme e Kryesisë së Partisë Demokratike, ka nxjerrë në pah mosmarrëveshjet brenda Partisë Demokratike.
Jemin Gjana dhe Valbona Mezini kanë debatuar ashpër gjatë mbledhjes e cila nisi rreth orës 18:00 të ditës së djeshme.
Në audion e “syri.net”, dëgjohet edhe kryetari Lulzim Basha, i cili është përfshirë në debat. Ndërkohë që Mezini nuk lejon Gjanën të mbarojë fjalën që kishte nisur, Basha i del në mbrojtje këtij të fundit.
“Më fal një sekondë, ato të gjitha që ai po i thotë po i demaskon tek ju. unë po e dëgjoj, nuk po e kundërshtoj, Genta a ka mundësi”, thotë Basha.
Mirëpo askush nuk ia vë veshin kryetarit dhe debati vazhdon. “Po, është e vërtetë që kemi pretenduar. Kush je ti që na privon ne që të kemi apo jo ambicie? Të kesh ambicie në partinë tënde është mëkat?
Çfarë problemi ka këtu? Këto që thua ti janë mendime komuniste. Kujt i tregon ti se çfarë duhet të them dhe çfarë jo?”, vazhdon Mezini.
Kështu Basha detyrohet të ndërhyjë edhe njëherë për t’i dhënë fjalën Jemin Gjanës.
“Absolutisht jo, të mbarojë ai dhe të sillemi në mënyrë të civilizuar, Jemin”, thotë kryetari i PD-së që detyrohet të ngrejë zërin për ta dëgjuar të tjerët që bërtasin.
Ndërkohë ditën e sotme Basha ka deklaruar duke thënë se në aleancë ka vend për mendim kritik,
“PD ka vetëm një kundërshtar, që nuk është thjeshtë një person, por aleanca e krimit. Dhe ne jemi përballë, si aleanca e vlerave. Në këtë aleancë ka vend për mendimin kritik, për debat dhe marrjen e vendimeve siç u mor sot; vendim unanim për të nisur menjëherë një proces analize dhe konsultimi me bazën demokrate me qëllim forcimin, reformimin, bashkimin dhe përballjen me Edi Ramën dhe qeverinë e dalë përmes tjetërsimit kriminal të vullnetit të shqiptarëve.”, shkruan Basha paraditen e sotme.
(D.D/Shuplaka)
Discussion about this post