Kryetari i Komunës së Bujanovcit, Shaip Kamberi, në një intervistë për Fax News për gazetaren Armela Ferko ka folur mbi debatin e krijuar për korrigjimin e kufijve midis Serbisë dhe Kosovës.
Kamberi u shpreh se të gjitha këto diskutime janë pozitive, pasi sipas tij pas shumë kohësh po sillet në vëmendje çështja e shqiptarëve në Luginën e Preshevës.
Gjithashtu ai theksoi se nuk është për një zgjidhje parciale pasi mund të shkaktojnë eksode të reja shqiptare dhe humbje të territoreve strategjike.
“E kemi cilësuar si diçka pozitive që po ndodh në kohët e fundit, pas një harrese të disa viteve Lugina e Preshëvës është sërish në vëmendje të faktorit kombëtar, por edhe të bashkësisë ndërkombëtare. Prandaj këtë në e shohim si një mundësi të re për çështjen e shqiptarëve në Luginën e Preshëvës që të diskutohet në nivele më të larta. Ne kemi potencuar një takim me presidentin Thaçi për këtë çështje. Pasi dhe Serbia ka dalë me opsionin e shkëmbimit të kufijve dhe me këtë rast ofron Komunën e Preshevës për katër komunat e veriut të Kosovës, për ne kjo do të ishte një zgjidhje parciale.
Lugina e Preshëves përfshin tre komunat me shumicë shqiptarë dhe kemi kërkuar që të trajtohet si tërësi dhe jo që pjesa tjetër e shqiptarëve të mbetet në Serbi. Të bëhët kështu siç është ajo në territoret ekzistuese. Presidenti Thaçi na ka premtuar që kërkesat tona t’i paraqesi në tryezën e bisedimeve.
Kërkesa e gjithë spektrit politik shqiptar në Luginën e Preshevës ishte dhe është përfshirja e çështjes së shqiptarëve në bisedimet me Serbinë, dhe gjetja e zgjidhjes për statusin e shqiptarëve të këtushëm përmes aplikimit të parimit të reciprocitetit me këtë shtet.
Zgjidhja e pjesshme do të thotë së pjesa tjetër do të mbesin pakicë pa mundësi të realizimit të drejtës. Pastaj do të ketë shpërngulje masive në këto territore.
Bashkësia ndërkombëtare është ajo që është ndërfutur. Ne kemi thënë që kjo temë e territorit duhet të trajtohet në tërësi dhe në reciproritet të drejtash. Lugina e Preshevës duhet të jëtë temë e zgjidhjeve në Bruksel. Ne jemi që mos të dëmtohet Kosova, por lugina e Preshëvës duhet të përfshihet në këtë proces diskutimi.
Ne e kemi thënë dhe publikisht dhe do të presim në ditët në vijim se cili opsion është më i mirë për Kosovën, por duhet të përfshijë dhe një zgjidhje të mirë për shqiptarët në Luginën e Preshevës. Nëse ky proces përfundon pa përmendur Luginën e Preshëvës, do të jetë një shans i humbur për ne dhe do të ketë një shpërngulje të banorëve.
Procesi i Brukselit nuk mund të përfundojë pa bashkësinë ndërkombëtare dhe qëndrimi i tyre është mjaft i rëndësishëm. Ajo që ne do të insitojmë është se ky është rasti i fundit që ne të kërkojmë në bashkëbisedime Luginën e Preshevës.”
(M.Q/Faxweb)
Discussion about this post