Vjosa Osmani ka thyer heshtjen pas nënshkrimit të marrëveshjes mes LDK-së dhe VV-së për formimin e qeverisë së re pas zgjedhjeve të 6 Tetorit, ndërsa ishte hapur debati për ndryshimet e minutës së fundit në propozimet për kabinetin ku kandidatja për kryeministre, nuk do të merrte postin e ministres së Brendshme sikurse e kishte kërkuar.
Osmani ka deklaruar përmes një reagimi në rrjetet sociale, se arritja e marrëveshjes është një hap pozitiv të cilin e kishte mbështetur që pas zgjedhjeve të përgjithshme, ndërsa ka theksuar qëndrimin e saj se aleanca me VV-në, është e natyrshme pasi e kanë kërkuar qytetarët e Kosovës.
Për sa më lart, Osmani duke pranuar në njëfarë mënyrë kushtet e koalicionit, argumenton se nuk do të ndalet deri në fitore sikurse qytetarët kanë shpresuar dhe kanë besuar tek ndryshimi që ka ndodhur me rrotacionin politik në vend
Reagimi i Vjosa Osmanit:
Të dashur qytetarë të Republikës së Kosovës,
Krijimi i institucioneve asnjëherë nuk ka qenë një punë e lehtë dhe një proces i thjeshtë. Kjo komplikohet edhe më tepër kur krijimi i institucioneve nënkupton edhe ndryshim të epokave. Që nga fillimi jam angazhuar pa asnjë interes personal për të bërë realitet koalicionin LDK – LVV, për një arsye shumë të thjeshtë: sepse ky ishte vullnet qytetar. Ky ka qënë edhe obligim të cilin e kam marrë prej mbi 200 mijë votave që i mori LDK në zgjedhjet e fundit. Kjo ishte një porosi e qartë për mua dhe për partinë që të ndryshojmë vendin. Marrëveshja që është nënshkruar sot në mes të kryetarit Mustafa dhe kryetarit të LVV’së Kurti ishte një lajm i mirë për të gjithë qytetarët e vendit. Ata ka muaj që po e pritnin një marrëveshje të tillë. Ngjarjet që rrjedhin jo gjithmonë janë pikërisht sic i kemi paramenduar. Por, sido që të jëtë, asnjë lindje nuk është e lehtë. Këtë e dimë më së miri ne që jemi nëna. Nuk është e lehtë as lindja e ndryshimit. Rrugës do të hasim në vështirësi, me të cilat duhet të merremi, kundër të cilave duhet të luftojmë. Sa më shumë që do të luftojmë ne aq më shumë do të hasim në rezistencë. Mirëpo rrugë tjetër nuk ka. Deri në fitore.
Qytetarët kërkuan dhe përcaktuan bashkimin tonë. Dhe si çdoherë, na treguan e trasuan rrugën e drejtë. 6 tetori, për mua, ishte dhe mbetet vullnet që nuk shkelet; me asnjë kusht e asnjë çmim. Shumë mund e përpjekje u bënë për të na ndalur e perqarë. Por shumë më i madh ishte vullneti ynë për të jetësuar kërkesën për ndryshim. Dhe tani, ua kemi borxh qytetarëve, e të gjithë atyre që nuk hoqën dorë nga besimi në ne, që fjalën e dhënë ta jetësojmë deri në fund. Nesër do t’i themelojmë institucionet e reja. Do t’i marrim përgjegjësitë e reja. Nuk ka asgjë që na ndalë.
(F.GJ/FAXWEB.AL)
