Ndërkohë që gjithë vëmendja është zhvendosur ditët e fundit, e sidomos gjatë pasdites së sotme në Shkodër, për shkak të dorëheqjes së Valdrin Pjetrit nga marrja e detyrës së kryebashkiakut të këtij qyteti pas skandalit me denoncimet e bëra publike nga PD, ka reaguar edhe kryeministri Edi Rama por jo për çështjen në fjalë.
Me anë të një postimi në rrjetet sociale, Rama ka përcjellë fjalët që sipas tij janë thënë nga aktorja, Suela Konjari e cila shprehet në gjithë prononcimin e saj, se është i nevojshëm komunikimi dhe marrëveshja midis palëve që janë ‘pro’ dhe ‘kundër’ shembjes së Teatrit Kombëtar.
“Me këtë dua të them, ju ftoj të gjithëve, veten time të parën, ju dhe gjithë kolegët e mi, edhe specialistët, që t’i tejkalojnë bindjet partiake, teatri është mbi partite”, citon Rama të ketë thënë Konjari.
Postimi i kryeministrit:
Suela Konjari i përket gjeneratës që doli në skenë në vitet e vështira të ndryshimit të sistemeve dhe spikati me rolet e saj përpara publikut të Teatrit Kombëtar. Në çështjen e shumëdebatuar të godinës së teatrit, ajo ndan të njëjtin opinion me shumicën dërrmuese të komunitetit teatror
SUELA KONJARI:
Kur mbaron një shfaqje teatri, melodia e parë që vjen për aktorin në skenë janë duartrokitjet e publikut. Me këtë dua të them, ju ftoj të gjithëve, veten time të parën, ju dhe gjithë kolegët e mi, edhe specialistët, që t’i tejkalojnë bindjet partiake, teatri është mbi partitë. Shpresoj shumë dhe do të dëshiroja që të arrihet një gjuhë e përbashkët sepse çelësi sekret për t’i zgjidhur problemet në këtë botë kaq të ndërlikuar ku jetojmë, është thjesht dashuria, ta dëgjojmë dhe besojmë njëri-tjetrin. Teatri na jep mundësinë që ta duam njëri-tjetrin dhe ta besojmë. Shpresoj që të arrijmë më të mirën e mundshme.
(F.GJ/FAXWEB.AL)
