Aktori Julian Deda reagon ashpër për mbylljen e Teatrit Kombëtar në Tiranë në këto ditë të ftohta dimri. Mirëpo Deda ka dhe një mesazh të fortë për drejtorin Hervin Çuli. ”O drejtor mos fut më servilat e tu të më marrin në telefon për të hequr statuse, se nuk më punon butoni “delete” në këto raste.”, shkruan aktori.
REAGIMI I PLOTË:
”Kam më shumë se tre Dimra që e them, që në Teatrin Kombëtar ngrin nga të ftohtit. Aq shumë e kam denoncuar si fakt, sa më kanë ardhur telefonata nga miq artistë, sigurisht të nxitur nga drejtori i paaftë i atij institucioni, për të hequr statuset ku flitej pikërisht për këtë. Por më në fund ja ku vjen dita që vetë institucioni lajmëron një gjë të tillë, por edhe kësaj rradhe kërkon të fshihet pas gishtit. I qenkan ngrirë tubat kaldajës? Po pse vetëm në këto ditë është ftohtë? Aty është kallkan çdo ditë të Dimrit. Aty është një tmerr. Drejtori e ndez kaldajen vetëm kur jepet çmimi “Bleta e artë”, se ka frikë mos i ftohet shefi. Dy rrugë ka, ose të ndërrohet drejtori dhe të ndizet kaldaja edhe gjatë repertorit normal, ose të mbyllet Teatri gjatë dimrit se i kanë ngrirë trutë drejtuesve.
P.s. O drejtor mos fut më servilat e tu të më marrin në telefon për të hequr statuse, se nuk më punon butoni “delete” në këto raste. Pres telefonata”
Dje Teatri Kombëtar dha njoftimin se kishte pezulluar shfaqjet duke njoftuar: ”…për shkak të temperaturave shumë të ulëta të këtyre ditëve, ngrica ka prekur tubacionet që furnizojnë me ujë kaldajën e teatrit duke e bërë të pamundur funksionimin e saj. Për këtë arsye shfaqjet e programuara për datat 12-13-14-15 Janar nuk do të jepen. I kërkojmë ndjesë publikut dhe rishihemi së shpejti në sallën e Teatrit Kombëtar!” (V.G/SHUPLAKA)
