“Këshilli i Bashkimit Europian vendosi të vazhdojë mbështetjen e Shqipërisë për integrimin në BE, duke vënë në pah që në pikën e parë ndryshimet kushtetuese të miratuara në mënyrë unanime, duke i hapur rrugë reformës në drejtësi sipas standardeve më të mira”, shkruan deputetja e Partisë Demokratike, Jorida Tabaku, pas deklaratës së përbashkët të vendeve anëtare të unionit.
Me anë të një postimi të saj në Facebook ajo shprehet se “Këshilli i Europës thekson pesë pikat për hapjen e negociatave. Këshilli ka inkurajuar Shqipërinë që të ndjekë një reformë në drejtësi dhe kërkon rezultate konkrete në betejën kundër korrupsionit në nivele të larta, krimit të organizuar si dhe betejën për zhdukjen e rrjeteve kriminale të drogës dhe trafikut”.
Sipas saj, “Topi është në fushën tonë. Nuk ka as rrezik islamik, as euroskepticizëm, as lodhje nga zgjerimi e askënd që bllokon këtë proces! Duhet punë, duhet përkushtim e duhet që integrimi europian të jetë prioritet kombëtar! Europa duhet fituar, nuk na e fal askush”.
Postimi i plotë i Jorida Tabakut:
Europa që duhet fituar!
Këshilli i Bashkimit Europian, pas mbledhjes së tij, vendosi ndër të tjera të vazhdojë mbështetjen e Shqipërisë për integrimin në BE duke vënë në pah që në pikën e parë ndryshimet kushtetuese të miratuara në mënyrë unanime, duke i hapur rrugë reformës në drejtësi sipas standardeve më të mira.
Mirëpo me gjithë mbështetjen për Integrimin, Këshilli Europës thekson pikat e mëposhtme si të rëndësishme për hapjen e negociatave:
– Këshilli ka inkurajuar Shqipërinë që të ndjekë një reformë në drejtësi të kuptueshme dhe të plotë duke rritur kësisoj profesionalizmin, eficencën dhe pavarësinë e gjyqësorit.
– Përveç kësaj i kërkohet një betejë më e fortë dhe rezultate konkrete në betejën kundër korrupsionit në nivele të larta, krimit të organizuar si dhe betejën për zhdukjen e rrjeteve kriminale të drogës dhe trafikut.
– Kërkohet masa legjislative dhe politike më efiçiente për të përforcuar të drejtat e njeriut dhe politikat anti-diskriminuese, përfshirë edhe trajtimin e barabartë të gjithë minoriteteve dhe të drejtat për këdo nga këto persona në gjithë Shqipërinë sikundër edhe zbatimin korrekt të së drejtës së pronësisë.
– Komisioni vëren një betejë shumë të vakët sa i takon pastrimit të parave, trafikimit të qenieve njerëzore si dhe mungesës së bashkëpunimit mes policisë dhe prokurorisë.
– Një tjetër kusht që ndodhet në deklaratën e ministrave të jashtëm, lidhet me zbatimin e ligjit të dekriminalizimit si një qasje e cila do të largojë nga parlamenti personat me të shkuar kriminale. Një pikë kjo e cila i shtohet kushteve për anëtarësimin e vendit në BE!
– Në deklaratën e komisionit flitet për përforcim të reformave që do të ndihmojnë rritjen e konkurueshmërisë në treg duke e inkurajuar vendin të ndërmarrë hapa për të përmisuar klimën e investitorëve dhe biznesit e duke përmisuar konsolidimin fiskal.
– Qeverisë shqiptare i kërkohet që të ulet dhe të punojë bashkë me opozitën dhe faktorët politik për një reformë elektorale të bazuar në rekomandimet edhe direktivat e OSBE-OHDIR dhe këto ndryshime të ndodhin përpara zgjedhjeve parlamentare të radhës, në mënyrë të tillë që të sigurohen standardet elektorale Europiane. Duke i përcaktuar edhe zgjedhjet si një pikë kyçe për negociatat.
– Qeverisë i kërkohet që të vazhdojë të mbajë një qëndrim konstruktiv sa i takon bashkëpunimit rajonal. KE i tërheq vëmendjen Shqipërisë se aksionet dhe qëndrimet që kanë një impakt negativ mbi raportet e fqinjësisë së mirë duhet të shmangen.
Topi është në fushën tonë. Nuk ka as rrezik islamik, as euroskepticiziem, as lodhje nga zgjerimi e askënd që bllokon këtë proces! Duhet punë, duhet përkushtim e duhet që integrimi europian të jetë prioritet kombëtar! Europa duhet fituar, nuk na e fal askush!
Discussion about this post