Deklarata e fortë e Demirajt: Kam gati 124 emra, pjesë e grupeve kriminale

Ministri i Brendshëm, Dritan Demiraj, ka bërë një deklaratë mjaft të fortë në një intervistë në Report Tv, me Ilir Babaramon.

Ai ka thënë se disponon një listë me 124 emra të cilët janë pjesë e grupeve kriminale.

Gjithashtu ai vuri në dukje se kanabisi kultivohet me mbështetjen e policisë dhe qeverisë vendore.

“Unë kam një listë shumë të madhe, të përbërë nga 124 emra, për shkak edhe të funksionit, për shkak të një bashkëpunimin më të mirë sesa paraardhësit e mi me agjensitë e tjera.

Kjo është një listë e hartuar nga agjenci të ndryshme të cilat nuk i përmënd këtu.

Sigurisht që kryeministri dhe gjithë personat që duhet ta kenë, e kanë këtë listë e kanë dhe ne jemi duke punuar në funksion të detyrës organike që kemi për ta pastruar përfundimisht Shqipërinë nga ky fenomen, nga trafiqet në mënyrë që Shqipëria të mos figurojë më në hartën e vendeve që trafikojnë.

Po tani duhet të themi të vërtetën, pa mbështetje politike nuk kultivon dot kanabis.

Pa mbështetjen e policisë dhe qeverisë vendore, kryetarit të komunës, kryetarit të bashkisë, kryetarit të partisë së tij nuk kultivon dot kanabis. Ka pas raste se sasira tonelatash droge ndodheshin në shtëpinë e punonjësit të policisë”,  tha Demiraj. (B.H/Shuplaka)