Gjatë një diskutimi në një universitet privat, kreu i PBDNJ-së, Vangjel Dule bëri një deklaratë që nuk pritej në lidhje me diskutimet e deritanishme me ndërkombëtarët për mundësinë për të hyrë në zgjedhje.
Ai tha se ndërkombëtarët i kanë bërë një “ofertë” jo vetëm atij por edhe 4 partive të tjera në takimet e mbajtura.
“Në takimet me diplomatët kryesisht kanë qenë në formën e paraqitjes së argumenteve të njohura nga ana e partive të opozitës. Kam dëgjuar dhe diçka të cilën po ta kisha dëgjuar individualisht nuk do të merrja përgjegjësinë ta thoja publikisht. Fatmirësisht isha dhe me kolegë të tjerë politikanë, ditët e fundit, që dëgjova një propozim kaq cinik që nuk e besova se e dëgjova. Na u tha në prani të përfaqësuesve të 4-5 forcave politike që ndoshta mund të ishte një shans i mirë për ne që të përfitonim nga mospjesëmarrja e Partisë Demokratike në zgjedhje për të marrë ndonjë mandat më tepër. Nëse do të isha “tetë a tetë” me atë bashkëbisedues nuk do të merrja përgjegjësinë ta thoja publikisht, por isha me fat se isha me të tjerë që e dëgjuan. Duhet ta keni të qartë që ka dhe nga këto mendime” – u shpreh Dule.
Dule vazhdoi më tej kur tha se të gjitha të dhënat të çojnë në shtyrjen e zgjedhjeve dhe në plotësimin e kërkesave të opozitës e cila ka refuzuar të regjistrohet në zgjedhjet e 18 qershorit për të marrë pjesë.
Dule është pjesë e opozitës së bashkuar dhe ka qenë vazhdimisht kritikues i Ramës. (M.D/ Shuplaka)
