Pas deklaratës së Prokurorisë së Tiranës në lidhje me hetimin që ka nisur për kontratat e lobimit nga Partia Demokratike të pa deklaruara sipas ligjit (lexo ketu) ka reaguar Partia Demokratike e cila e ka cilësuar si një çorbë të gatuar politikisht nga Prokuroria e cila po përdoret nga Edi Rama.
Në këtë reagim thuhet se “Deklarata e sotme e Prokurorisë është e paligjshme, e gënjeshtërt, e paprecedentë, vetëdiskredituese dhe e gatuar politikisht”.
Sipas PD-së dalja me konkluzione hetimore ende pa përfunduar hetimin, tregon se Prokuroria po përdoret politikisht sipas saj, dhe po i shërben propagandës qeveritare kundër opozitës së vendit.
Deklarata e Partisë Demokratike
Deklarata e sotme e Prokurorisë është e paligjshme, e gënjeshtërt, e paprecedentë, vetëdiskredituese dhe e gatuar politikisht.
Dalja me konkluzione hetimore ende pa përfunduar hetimin, si asnjëherë më parë në këto 30 vjet, tregon se Prokuroria po përdoret politikisht dhe po i shërben propagandës qeveritare kundër opozitës së vendit.
Partia Demokratike nuk ka shkelur asnjë ligj dhe ka deklaruar të gjitha shpenzimet e kryera në vitin 2017.
Pasi gënjeshtra e madhe që kishte ngritur për hetimin e Partisë Demokratike i plasi në dorë, pas informacioneve të ardhura nga SHBA dhe Skocia, Edi Rama në dëshpërim ka vendosur të përdorë sërish prokurorinë duke e kthyer nga institucion të ligjit në institucion qesharak propagande.
Kujtojmë se paraditën e sotme në organin e akuzës kanë qenë: Lulzim Basha, Gazment Bardhi, Ilir Dervishi, dhe Arben Ristani.
Prokurori e Tiranës deklaroi ndër të tjera se “nga hetimi kanë rezultuar dyshime të arsyeshme të bazuara në prova se ka një diferencë thelbësore mes deklarimeve të bëra zyrtare për shpenzimet e bëra nga subjekti PD, dhe shpenzimeve reale që ky subjekt ka bërë. Ky subjekt ka deklaruar vetëm shumën prej 25 000 dollarësh, dhe nuk ka bërë deklarime për shumën prej 650 000 dollarësh”.
Discussion about this post