Në vijim të ngjarjes së sotme të protestës së banorëve të Kukësit kundër tarifës në Rrugën e Kombit, ka reaguar edhe Prokuroria e Përgjithshme e Shqipërisë.
Në deklaratën e Prokurorisë thuhet se institucioni i akuzës po ndjek me vëmendje ngjarjet e zhvilluara në protestën e paradites së 31 marsit në segmentin rrugor pranë Tunelit të Kalimashit në Rrugën e Kombit.
Prokurorja e Përgjithshme Arta Marku, ka uruar shërimin e shpejtë të të lënduarve në Protestë dhe ka deklaruar bashkëpunimin me Policinë e Shtetit për zbardhjen e plotë të ngjarjes.
Ndërkohë, drejtuesja e Prokurorisë së Rrethit Gjyqësor Kukës Alketa Nushi me një grup prokurorësh të kësaj prokurorie, shkuan në vendgjarje dhe po punojnë për të gjetur autorët dhe shkaktarët e dhunës.
Mësohet se kryeprokurorja Marku ka vënë në dispozicion të Prokurorisë së Kukësit të gjitha burimet e nevojshme për hetimin dhe vendosjen përpara përgjegjësisë penale të cilitdo që ka shkelur ligjin.
(E.L/Faxweb)
Discussion about this post