Deputeti Gazment Bardhi ka reaguar në rrjetet sociale në lidhje me deklaratën e Ramës sot në takim me ndërtuesit.
Kryeministri Rama tha se nuk do tolerohen më ata ndërtues që nuk i deklarojnë saktë fitimet e tyre nga shitjet e apartamenteve.
Sipas Bardhit, kryeministri Rama duhet hetuar nga SPAK për këtë deklaratë, pasi ai është në dijeni të evazionit dhe jo vetëm kaq, por e ka lejuar që të ndodhë dhe ka bashkëpunuar me bizneset.
SPAK duhet të veprojë pasi firma e Ramës është kudo që shpallet një investitor strategjik në bregdet që fsheh pasurinë nga shitjet.
Postimi i Gazment Bardhit:
Edi Rama ka bërë sot një deklarim të vlefshëm për SPAK-un. Kryeministri e di që në biznesin e ndërtimit ka evazion fiskal dhe jo vetëm e ka lejuar të ndodhë, por ka bashkëpunuar për rritjen e evazionit duke u dhënë leje të reja ndërtuesve që fshehin të ardhurat.
Kush fsheh 5 mijë, 6 mijë, 7 mijë, 8 mijë euro m2 shitje? Nuk ka asnjë dyshim që ndërtuesit e tij të preferuar, të cilët, disa i ka shpallur investitorë strategjikë për resorte në bregdet, disa i pajis me leje për kulla. Në të gjitha rastet është firma e Edi Ramës. Dhe është koha që SPAK ta marrë seriozisht hetimin e kryeministrit për shpërdorim detyre përmes lejimit me mosveprim të evazionit fiskal!
