Deklarata e Ramës për hipotekat, sfidon LSI: Meqë pjesën e tepsisë e ka zotëria, 3000 familjet të marrin nesër dokumentet e pronësisë

Pas ish-ministrit të LSI-së, Ylli Manjani, ka qenë nënkryetari i Lëvizjes Socialiste për Integrim, Luan Rama, ai që i ka kthyer përgjigje kryeministrit e njëherazi kreut të PS-së për deklaratat e këtij të fundit mbi “tepsinë” duke u ndalur tek çështja e hipotekave, legalizimeve.

Ai e sfidoi haptazi kreun e Qeverisë, që nesër 3000 familjet që kanë mbetur pa marrë dokumentet e pronësisë të paraqiten për t’i tërhequr meqënëse tani i përket “zotërisë në fjalë” (Ramës).

“Me shumë hipokrizi dhe me mashtrim të plotë në raport me të vertetën, kryetari i Rilindjes tha sot në Vorë se sot janë 3000 familje që nuk kanë marrë hipotekat duke thënë se kjo është çështje e tepsisë.

Qëllimisht po e fsheh të vërtetën. Kjo ka të bëjë me faktin se hipotekën në qarkun e Tiranës, Durrës, Vlorë, Elbasan, 80% të vendit, e kanë njerëzit e emëruar prej tij. Unë i ftoj të 3000 familjet të Bashkisë së Vorës, që të paraqiten nesër të marrin aktet e bashkisë meqënëse tani e ka zotëria në fjalë gjithë pjesën e tepsisë.

Regjistruesi të bëjë gati 3 mijë certifikatat e pronësisë për të dëshmuar të vërtetën se kush i mban ato peng.”

(XH.A/SHUPLAKA)