Presidenti i SHBA-së, Donald Trump, ka vlerësuar lart deklaratat e bëra nga Presidenti rus, Vladimir Putin, në lidhje me marrëdhëniet mes Moskës dhe Uashingtonit. Në një bisedë me gazetarët të premten, Trump theksoi se deklaratat e Putin ishin shumë pozitive dhe treguan një kthim të respektit për Shtetet e Bashkuara.
Trump deklaroi: “Vladimir Putin bëri disa deklarata shumë të mira sot”. Ai shtoi se, ndryshe nga vitin e kaluar kur Joe Biden ishte president, tani presidenti rus respekton Shtetet e Bashkuara, së bashku me liderët e tjerë botërorë si Xi Jinping i Kinës dhe Kim Jong Un i Koresë së Veriut.
“Vitin e kaluar, nuk e respektonin vendin tonë. Kishim një president të paaftë dhe njerëz të këqij rreth tavolinës,” tha Trump. “Por tani, bota e respekton përsëri vendin tonë,” theksoi ai, duke u shprehur se administrata aktuale ka rikthyer respektin ndërkombëtar për SHBA-në.
Në deklaratën e tij, Putin pati gjithashtu vlerësime për përpjekjet e Trump për të ndihmuar në zgjidhjen e krizës në Ukrainë. Ai e quajti Trump një udhëheqës të guximshëm dhe vuri në dukje se kishte një respekt të madh për të. Presidenti rus gjithashtu theksoi se ishin krijuar kanale të rëndësishme komunikimi midis agjencive të SHBA-së dhe Rusisë, përfshirë lidhje direkte mes Departamentit të Shtetit dhe Ministrisë së Punëve të Jashtme, si dhe mes shërbimeve speciale.
Marrëdhëniet mes dy shteteve kanë qenë të tensionuara, por ky dialog sugjeron një hap të mundshëm për stabilizimin e marrëdhënieve SHBA-Rusi.
