Pas deklaratave të Shkëlzen Berishës, ku sapo kishte dalë nga Gjykata tha se, Balla nuk ka qenë i pranishëm sot në seancë për shkak se ka pasur frikë që të përballet me akuzat për lidhjen me biznesmenin Bego, ka ardhur edhe reagimi i Taulant Ballës.
Kryetari i Grupit Parlamentar të Partisë Socialiste, Balla ka deklaruar përmes një postimi në rrjetet soiciale se, Shkëlzen Berisha nuk shpëton dot pa u ndërshkuar në dosjen CEZ.
“Shkëlzen Sali Berisha! Paske bilbilosur para Gjykatës sot në mungesën time dhe qenke trimëruar mesa shoh para gazetarëve, por mos të të rrejë mendja se do shpëtosh dot pa u ndëshkuar në dosjen CEZ”, shkruan Balla.
Balla deklaron gjithashtu se tani i ka ikur edhe Berisha nga Parlamenti njëherë e mirë, ai do ti përkushtohet me të gjithë seriozitetin që meriton një thëngjill të zbuluar si ai.
“Bëhu gati Zen se halle të mëdha të presin”, e mbyll Balla reagimin.
Postimi i plotë i Taulant Ballës:
“Shkëlzen Sali Berisha! Paske bilbilosur para Gjykatës sot në mungesën time dhe qenke trimëruar mesa shoh para gazetarëve, por mos të të rrejë mendja se do shpëtosh dot pa u ndërshkuar në dosjen CEZ!
E pata të pamundur të jem sot aty përballë teje për arsye angazhimi si deputet në qarkun e Elbasanit, por herën tjetër do marr masat që të mos mungoj. Tani që të iku edhe babi nga Parlamenti njëherë e mirë, do të të përkushtohem me të gjithë seriozitetin që meriton një thëngjill i zbuluar si ti. Bëhu gati Zen se halle të mëdha të presin”, shkruan Balla.
(F.GJ/FAXWEB.AL)
