Kreu i PD-së, Lulzim Basha, ka reaguar lidhur me deklaratat kontradiktore të Kryeministrit Edi Rama dhe ministrit të Brendshëm, Fatmir Xhafaj, lidhur me kapjen e 613 kilogramëve kokainë.
Në një status në Facebook, Basha shkruan se klanet e drogës janë përçarë për shkak të milionave të kokainës.
“Kokaina fut në sherr klanet e drogës në qeveri.
Edi Rama dhe Fatmir Xhafaj janë aq të pabesueshëm saqë i pari i bandës thotë se operacioni për kokainën ishte rezultat vetëm i agjencive shqiptare, ndërsa i dyti thotë se kapja u krye në bashkëpunim me agjencitë e huaja.
Cilin nga klanet e drogës duhet të besojmë? Atë të Edi Ramës, pra klanin e kokainës së Xibrakës, apo klanin e Bolonjës së Agron Xhafajt i cili ka përvojë më të gjatë me trafikun e drogës nga Amerika Latine, për të cilin është dënuar në Itali.”-shkruan Basha.
Përplasja Rama-Xhafaj
Ndërsa përshëndeti aksionin e policisë kryeministri Rama tha se operacioni është zhvilluar i gjithi në territorin e vendit, pa asnjë sinjalizim nga vendet europiane.
“Edhe fakti që ky operacion është zhvilluar i gjithi në territorin e vendit, pa asnjë sinjalizim nga vendet europiane ku ngarkesa ka udhëtuar përpara se sa të hynte në portin e Durrësit, ka domethënien e rëndësishme të forcës ligjzbatuese që disponojmë sot, duke nisur nga pikat doganore”, shkruajti Rama.
Por ndryshe nga kryeministri ministri i Brendshëm Fatmir Xhafaj në reagimin e tij tha se operacioni u krye në bashkëpunim me agjencitë ligjzbatuese vendase dhe të huaja.
“Një superaksion i Policisë së Shtetit në bashkëpunim me agjencitë e tjera ligjzbatuese vendase dhe të huaja. Goditje e fortë trafikut ndërkombëtar të drogës! Hetimi vazhdon! Forca e Ligjit, forca e shtetit po vepron. Pas pak detajet nga policia e shtetit në një konferencë për shtyp”, deklaronte Xhafaj
(F.G/Faxweb.al)
