Deklaratat kundër opozitës, Doris Pack ‘fishkullon’ Knut Fleckenstein: Kam turp nga ti

Ish-anëtarja e Parlamentit Europian, dhe një personazh mjaft i njohur nga shqiptarëtr, Doris Pack, ka reaguar pas deklaratave të eurokomisionerit Knut Fleckenstein pas vizitës në Shqipëri.

Ajo e konsideron si hipokrizi qëndrimin e Fleckenstein, ndërsa shprehet se ndihet e turpëruar nga ai, pasi sipas saj asnjëherë nuk ka kritikuar miqtë e tij socialistë për krimin dhe qeverisjen e korruptuar.

Me anë të një postimi në rrjetet sociale ajo shprehet  ndër të tjera se “Shqiptarët humbën shpresën, po vuajnë dhe lënë vendin. Kam turp nga ti”.

Ky reagim i ashpër i ish-zyrtares së lartë të Bashkimit Europian vjen si pakënaqësi ndaj deklaratave të Fleckenstein në Tiranë përpara disa ditësh ku doli në mbështetje të qeverisë dhe sulmoi ashpër opozitën duke thënë se i ka humbur durimi me sjelljet e saj (Lexo këtu)

Reagimi i Doris Pack:

“Knut Fleckenstein gjykimi i Opozitës në Shqipëri për sjellje jodemokratike është hipokrizi, është një thirrje për ndihmë nga BE-ja. Asnjëherë në vitet e fundit nuk keni kritikuar miqtë socialistë për krimin dhe qeverisjen e korruptuar. Shqiptarët humbën shpresën, po vuajnë dhe lënë vendin. Kam turp nga ti”.

Pjesë nga deklarata e Knut Fleckenstein bërë para pak ditësh në Tiranë pasi ishte takuar bashkë me 6 anëtarë të tjerë të delegacionit me krerët më të lartë të politikës shqiptare:

“Po humbas durimin nga qëndrimi i deputetëve të opozitës, protestat të ruajnë qetësinë, pamjet e protestave vonojnë integrimin. Më 19 qershor Këshilli do të marrë vendimin për Shqipërinë, teksa procesi i reformave është duke vazhduar dhe vettingu po ashtu. Ne i bëjmë thirrje Këshillit të përqëndrohet në këto fakte, që në qershor të çelen negociatat. Sa i përket problemeve tuaja të brendshme, ne nuk kemi dyshim që ky Parlament do të vazhdojë rrugëtimin e tij. Parlamenti do të vazhdojë rrugëtimin, ndoshta edhe me anëtarë të rinj. Jam zhgënjyer shumë veçanërisht nga kryetarja e LSI-së, Monika Kryemadhi, e cila na tha që opozita e ka marrë vendimin dhe nuk ka kthim pas. Presim që deputetët të bëjnë punën e tyre dhe të kthehen në Parlament. Edhe sikur opozita të ketë të drejtë për akuzat, bojkotimi nuk zgjidh asgjë”, tha Fleckenstein.

(F.GJ/FAXWEB.AL)