Jemi mësuar tashmë të dëgjojmë nga politikanët gafa që mënjëherë pasi thuhen bëhen meme në rrjet, ndërsa ata duhet në fakt të ishin personat më konçiz, elokuent dhe korrekt në artikulimet dhe veprimet e tyre.
Rastet e mëposhtme kanë të bëjnë me deklarata të bujshme të bëra se fundmi nga përfaqësues dhe zyrtarë të Partisë Socialiste, që edhe kanë çuditur opinionin publik pasi janë akumuluar.
Valbona Sako, ish-kryetarja e Bashkisë së Durrësit e dorëhequr tashmë me motivacionin se nuk e përballonte forcën e reagimeve për gafat e saj, tha pak ditë pas tërmetitt ë 26 Nëntorit se “Jemi të lumtur që vdiqën 51 persona”. Por kjo nuk ishte gafa e vetë e saj, pasi në të njëjtë ditë deklaroi: “Zotërinjtë po i çojmë në hotele me 5 yje, që vetë as nuk do kishin shkuar ndonjëherë”.
Natyrisht që ajo çfarë donte të thoshte nuk u tha në mënyrën më të mirë të mundshme, por kjo shërbeu si një arsye që e zgjedhura e 30 Qershorit të jepte dorëheqjen e në vend të saj të emërohej Zhulien Varfaj, një person shumë i afërm i paraardhësit të saj, Vangjush Dako.
Ornela Çuçi, zv/ministrja e Turizmit është personazhi i tjetër i “Rilindjes”, gafa e të cilës bëri bujë teksa po fliste për një media vendase për dekorimin e Durrësit në kuadër të Vitit të Ri, në një kohë kur qyteti sapo kishte përjetuar dramën e pa parë ndër vite, atë të tërmetit me magnitudë 6.4.
Teksa u pyet se a është e pranueshme që të dekorohet qyteti kur ende nuk kishte kaluar situata e jashtëzakonshme e shpallur nga qeveria për këtë Qark, Çuçi tha se nuk ka asgjë të jashtëzakonshme për të mos e bërë këtë gjë.
Një tjetër zv/ministre është mrekulluar me sa duket me punët e qeverisë që përfaqëson në menaxhimin e emergjencave pas tërmetit, aq shumë sa sipas saj, “ajo që kemi bërë ne pas tërmetit, s’është bërë as në botë”.
Personi në fjalë, zv.ministrja Rovena Voda e bëri këtë deklaratë gjatë një lidhjeje të drejtpërdrejtë me një emision televiziv.
Dhe në fund, vjen perla e Artan Shkrelit, edhe ky zv/ministër i ‘Rilindjes’ në punët e Infrastrukturës dhe Energjitikës i cili u pyet se pse qeveria nuk ka ende një plan përfundimtar për menaxhimin e banorëve që janë alarmuar për dëmet që kanë pësuar banesat e tyre.
(Këto ditë kemi parë raste të shumta ku banorët kërkojnë çertifikimin e banesave të tyre ku të njihen zyrtarisht ose si të banueshme pavarësisht dëmtimeve nga tërmeti, ose si të pabanueshme. Qytetarët kanë paraqitur vazhdimisht ankesa se ekspertët nuk kanë dhënë një sugjerim konkret nëse duhet të qëndrojnë në banesa apo jo).
Shkreli e dha përgjigjen në mënyrën më të pabesueshme të mundshme, përveç kësaj edhe komike kur tha: “Pse banorët do ndjekim ne për t’u thënë që pallatet janë të pabanueshme”
(F.GJ/FAXWEB.AL)
Discussion about this post