Partia Socialiste ka reaguar ndaj vendimit të Komisionit Qendror të Zgjedhjeve për të mos shpallur menjëherë rezultatet e votimit elektronik në Vorë dhe Njësinë Nr.10 në Tiranë.
Në një deklaratë për mediat, PS e cilëson këtë vendim si “arbitrar, të gabuar dhe zhgënjyes”, duke theksuar se bie ndesh me vetë logjikën e përdorimit të teknologjisë në zgjedhje dhe me transparencën që qytetarët presin nga KQZ.
“Ky vendim nuk ka asnjë arsyetim logjik apo teknik. Investimi i madh në infrastrukturën elektronike ka pasur për qëllim pikërisht rritjen e besimit dhe shpalljen e shpejtë të rezultateve. Vonesa e panevojshme krijon dyshime dhe tension të panevojshëm,” thuhet në deklaratë.
Partia Socialiste u ka bërë thirrje strukturave të saj dhe mbështetësve në Vorë të ruajnë qetësinë dhe të kenë besim se rezultati i votës është i paprekshëm. “Rezultati është në kuti dhe asgjë nuk mund ta ndryshojë atë. Ju jeni dallandyshja e parë e një fitoreje që do të mbetet në histori,” thuhet më tej.
PS i bën thirrje të gjithë përfaqësuesve të saj në të gjithë vendin të shmangin çdo provokim dhe të presin me durim numërimin për të nxjerrë nga kutitë vendimin e sovranit.
