Prej ditës së parë që ka ardhur në pushtet Trump është kundërshtuar mjaft fort për vendimin e tij për ndalimin e refugjatëve. Protesta të shumta janë zhvilluar kundër këtij vendimi që irriton shumë myslimanë nga vende të ndryshme të botës. Edhe nga pikëpamja ligjore Trump ka hasur në kundërshti të forta ku çështja është apeluar edhe në Gjykata të ndryshme.
Gjykatësi federal James Robart i cili ushtron punën e tij si në gjykatës në Seattle, ka vendosur një bllokim kombëtar mbi dekretin e presidentit amerikan Donald Trump, për ndalimin e udhëtarëve nga 7 vende myslimane. Dekreti i Trump vendoste një ndalim prej 90-të ditësh të lëshimit të vizave nga Administrata e Refugjatëve në SHBA, për të gjithë aplikantët.
Ndërkohë që është vendosur një ndalim pa limit kohor për pajisjen me vizë të shtetasve sirian. Nga ana tjetër ekziston një ndalim prej 120 ditësh për të gjithë personat që vinë nga Iraku, Siria, Irani, Libia, Somalia, Sudani dhe Jemeni. Gjykatësi federal James Robart, ka vendosur kundër avokatëve qeveritarë të cilët pretendonin se Shtetet e Bashkuara nuk kishin fuqinë për të kundërshtuar urdhrin ekzekutiv të presidentit Trump.
Dekreti për ndalimin e udhëtarëve nga shtatë vende me shumicë myslimane, i firmosur nga presidenti Trump gjatë javës së kaluar, shkaktoi protesta në shumë qytete të SHBAsë dhe konfuzion në aeroportet e vendit. Departamenti i Shtetit, ka njoftuar se që prej hyrjes në fuqi të këtij presidenti janë refuzuar 60 mijë kërkesa për viza.
Discussion about this post