Del në fushatë me punonjësit, procedohet penalisht drejtori i spitalit në Berat (EMRI)

Policia e Shtetit ka nisur procedimin penal ndaj drejtorit të Spitalit rajonal të Beratit Idlir Frashëri, kjo për shkak se ka marrë pjesë në fushatë sëbashku me punonjës të spitalit. 

Sipas policisë, Frashëri ka bashkëpunuar në fushatë me deputetin e zonës të LSI-së Gledion Rehovica.

Njoftimi i Policisë

Policia e Shtetit Drejtoria për Hetimin e Krimit Ekonomik e Financiar Sot në datë 05.06.2017, Sektori për Hetimin e Korrupsionit në Drejtorinë për Hetimin e Krimit Ekonomik e Financiar në Departamentin për Hetimin e Krimit të Organizuar dhe Krimet e Rënda në Drejtorinë e Përgjithshme të Policisë së Shtetit, mbi bazën e një denoncimi, filloi procedimin penal për shtetasin I.F, pasi duke qenë në funksion publik të Drejtorit Rajonal të Spitalit Berat, në bashkëpunim me disa punonjës të këtij spitali dhe deputetin e zonës G.R., kanë konsumuar elementët e veprës penale të “Korrupsionit aktive në zgjedhje” dhe “Përdorimi i funksionit publik në veprimtari politike ose zgjedhore”, vepra penale të parashikuara nga nenet 328 dhe 328/a të Kodit Penal.

Materialet procedurale i kaluan për kompetencë Prokurorisë së Përgjithshme Tiranë, për veprën penale të “Korrupsionit aktiv në zgjedhje” dhe “Përdorimi i funksionit publik në veprimtari politike ose zgjedhore”, vepra penale të parashikuara nga nenet 328 dhe 328/a të Kodit Penal. (D.D/Shuplaka)