Katër aktivistë pro-palestinezë janë akuzuar zyrtarisht nga autoritetet britanike për hyrje të paligjshme dhe dëmtim të rëndë të pajisjeve ushtarake në një bazë ajrore në Angli, si pjesë e një proteste kundër mbështetjes së Britanisë për Izraelin.
Incidenti ndodhi më 20 qershor në bazën ajrore RAF Brize Norton, në Oxfordshire, ku aktivistët depërtuan në territorin ushtarak dhe spërkatën me bojë të kuqe dy aeroplanë ushtarakë që përdoren për transport dhe furnizim me karburant. Sipas policisë kundër terrorizmit, dëmi i shkaktuar vlerësohet në rreth 10 milionë dollarë.
Të akuzuarit, të moshës nga 22 deri në 35 vjeç, ndodhen aktualisht në paraburgim dhe pritet të dalin para një gjykate në Londër të enjten. Ata përballen me akuza për komplot për të hyrë në një vend të ndaluar me qëllim cenimin e sigurisë kombëtare dhe komplot për të kryer dëme materiale. Autoritetet paralajmëruan se do të paraqesin prova që lidhen me terrorizmin.
Grupi Palestine Action mori përgjegjësinë për sulmin, duke e cilësuar si një akt simbolik kundër përfshirjes së Mbretërisë së Bashkuar në konfliktin në Gaza. Në një reagim të menjëhershëm, grupi deklaroi se “do të vazhdojë të kundërshtojë përfshirjen britanike në krimet e Izraelit”.
Tensionet u përshkallëzuan të mërkurën, kur ligjvënësit britanikë votuan për të shpallur Palestine Action një organizatë terroriste. Në përgjigje, grupi e cilësoi vendimin si “shpërdorim të pushtetit” dhe bëri të ditur se do ta sfidojë ligjërisht në gjykatë.
Palestine Action është bërë i njohur për sulmet e përsëritura ndaj kompanive britanike të lidhura me industrinë izraelite të mbrojtjes, përfshirë degët e Elbit Systems, një firmë izraelite e teknologjisë ushtarake.
Ngjarja ka shkaktuar debat të gjerë në Britani, ndërsa autoritetet kërkojnë të balancojnë të drejtën për protestë me ruajtjen e sigurisë kombëtare.
